歐聯第三輪分組賽，利物浦主場變陣出擊，兩球淨勝格拉斯哥流浪。
今場利記陣型由以往嘅433，轉為4231，沙拿、祖達、迪亞斯同紐尼斯同時上陣，中場收起法賓奴，由軒達臣搭住堤亞高。
從陣型到人腳，看似比之前更加進取，但實際上球隊嘅戰術取態，比之前稍有後退。
呼應小弟之前嘅文章《退一步海闊天空》，今場可見原來「退少少」，就可以有顯著嘅效果。唔洗學小弟話齋，又要轉三中堅，又要打防反，又要乜乜乜…，實在太好❕🤣
以往球隊進攻時，兩閘同左右中場都會壓上禁區頂。滲入/衝擊禁區，唔止係前線嘅工作。
今場有別於以往，球隊絕大部分進攻工作，都由前線四人包辦，只係早段加上森美卡斯嘅幫助。兩位中場同右閘阿諾壓上幅度明顯減少，更多直接派波上前同逗住中場。如此做法一來有助堵塞對方反擊空間，以保持控制力，二來能減輕中後場球員嘅覆蓋負擔。
(從第二幅圖，兩個間接製造入球嘅進攻情境中可見，軒達臣同堤亞高從前線有一大段距離，阿諾更未有進入畫面)
(從第三、四、五幅圖可見，軒達臣、堤亞高同阿諾三人相比上一場面對白禮頓，今場用球活動範圍更加集中於中後場)
今場對手格流水平相對一般，正好讓轉陣後，只練咗一課嘅利記球員實際執行。從理論上，小弟睇好高普連同教練團隊嘅戰術調整，而實際上，球隊仍需要時間令踢法熟練，先有最好嘅效果。
諗深一層，其實利記退化嘅部分主要在於中後場。球隊前線更新換代進度良好，祖達、迪亞斯同紐尼斯三人具備足夠嘅速率、活力同技術，亦適應到前場唔同位置。今場前線球員之間，縱橫交錯配合嘅踢法，正正發揮到佢哋嘅長處，加上沙拿或費明奴嘅經驗，前線進攻有望回歸「埃及文明」從前嘅面貌。希望呢個踢法，會係球隊今季嘅出路。
另外不得不提，阿諾入靚罰球立功，可算一吐烏氣。而防守方面，覆蓋負擔減少，漏洞亦自然減少。希望今場爭氣嘅表現，令佢重拾信心。
希望大家多多支持！撳多幾個掣，俾多幾個鼓勵！(例如「訂閱」掣，同埋follow IG: @football_era_talking 觀看更多唔同嘅短文/資訊/睇波即時story分享)
請按此登錄後留言。未成為會員? 立即註冊