利物浦不進則退 今季將會更加艱難

剛剛過去嘅轉會窗可謂史上最經典，美斯C朗兩大球王先後「出走」同「回家」，幾個重逢故事如盧卡古返車仔、基沙文返馬體會、保方返帕爾馬，加上唔少令人期待嘅轉會如曼城引入基亞利殊、皇馬簽卡馬雲加等。當各隊努力以轉會操作加強陣容，有一隊球隊卻在隔岸觀火。
講緊嘅係利物浦，新球季之中，歐洲列強人腳都有一番新景象，而利物浦繼續以原班主力征戰新球季。今個轉會窗，利記只從RB萊比錫收購中堅高拿迪，另外嘅一隊新血係從布力般流浪外借回歸嘅艾利洛，以及從修咸頓回歸嘅南野拓實。

利記中堅補強之下，後防以及中場嘅板凳深度足夠，問題在於前鋒線。沙基利離隊之下，利記於英超以及歐聯，比較重要嘅賽事中，前線足夠可靠令高普信任嘅只有沙拿、文尼、費明奴同祖達四人。

「埃及文明」三人今季一同步入30歲，經過長年消耗下，上季已出現疲態。季中祖達受傷下，三人曾陷入入球荒，球隊進攻即刻啞火，繼而連續失分。
今季季前，費明奴同祖達分別征戰美洲盃同歐國盃，若長期連續正選上陣，恐怕難以保持全季穩定發揮，費明奴季初已經受傷。沙拿同文尼季前雖有充足休息，但到明年一月需要征戰非洲國家盃，必定錯過部分英超賽事，且賽程頻密，舟車勞頓之下，下半季兩人亦難以保持良好狀態，甚至可能受傷。利記今季季初已經要於歐聯嘅死亡之組爭扎，將對球隊體能帶來一大考驗，加上以上因素，睇嚟球隊進攻火力將難免再次大幅下滑。

於頂級賽場競爭有如逆水行舟，不進則退。對比曼城、曼聯同車路士三個競爭對手，利記保守嘅轉會取態令主力老化嘅球隊難以爭奪英超冠軍。於今季英超聯賽中，利記似乎只屬爭四球隊，而身後嘅李斯特城以及熱刺今季亦有積極補強，利記保住前四嘅路途將比上季更加艱難。