世界盃非洲區外圍賽首回合丨賽後文章 : 非洲國家盃決賽翻版 形勢截然不同 (埃及 1-0 塞內加爾) 精選

世界盃非洲區外圍賽，上演非洲國家盃決賽翻版，由埃及主場迎戰塞內加爾，最終埃及以一球小勝。
體能狀態
比起非洲盃決賽，埃及長期處於「挨打」狀態，今場兩隊體能狀態更加平均，埃及冇明顯體能劣質之下，俾到塞內加爾嘅對抗，同當時嘅決賽係兩回事，令比賽形勢截然不同。

得以對抗
上半場雙方對攻之下，埃及得以搶到進攻機會，球隊上半場嘅射門次數比塞內加爾更多。早段一次攻勢，沙拿接應高波一控轉身一射中楣，皮球彈中對方左閘施斯入網，埃及因而領先。

防守方面，埃及亦能以壓逼阻止塞內加爾組織攻勢，塞內加爾落到底線配合、衝擊嘅次數遠比非洲盃決賽時少。
交替衝擊
上半場之中，埃及組織用波組織嘅效果比塞內加爾好，但唔足以令球隊獲得優勢，因塞內加爾能夠從唔同位置衝擊埃及防線，埃及必須防範。

塞內加爾右翼I.沙亞同右閘B.沙亞，兩位沙亞加上高安迪同Diedhiou輪番嘅配合足以吸引埃及以幾個人嘅包夾應付。上半場尾段開始，左路嘅文尼亦開始嘗試直接以個人突破殺入中路，埃及嘅壓迫力隨體能下降，面對塞內加爾左右交替，而具有衝擊力嘅進攻，漸漸更多收縮防守，將隊形收緊，減少後防嘅空間。

文尼發威
下半場塞內加爾係主動嘅一方，文尼一度爆發，進行幾次突破，分別試過從左邊底線扭入禁區、左路內切以一敵三、左路內切爆過兩人包夾。雖然最終隊友未能接應，但可見文尼狀態良好，相信佢到次回合仍會製造相當大的威脅。
無功而回
塞內加爾其後多次嘗試唔同進攻方法，但效果一般。尾段一次高波攻勢，文尼做支點為Dieng製造機會近門機會，可惜未能把握。回歸正選嘅埃及門將El-Shenawy尾段作出呢球關鍵撲救，令埃及最後保住勝局。

次回合預期
首回合埃及以一球領先，次回合塞內加爾返到主場相信會加大力度搶攻，埃及後防所受嘅壓力相信會更大。相對而言，沙拿連同穆斯塔法穆罕默德、跑得之人查斯古特，相信會有更多反擊嘅空間。最終世界盃入場券誰屬，答案將會於下星期二晚一點正，兩隊次回合嘅比賽揭曉。