世界盃非洲區外圍賽次回合丨賽後文章 : 塞內加爾調整見效 埃及曾有機會 最終籤運成關鍵 (塞內加爾 1-0 埃及 總比數 : 1-1)

世界盃非洲區外圍賽次回合,塞內加爾返到主場互射十二碼淘汰埃及。塞內加爾繼非洲杯之後再次擊敗埃及,獲得決賽周入場券。
追平比數
開場不久,塞內加爾憑藉左路罰球攻勢,埃及中堅加巴解圍失誤將波頂到對方腳下,讓迪亞入波助塞內加爾追平總比數。

火藥味濃烈
兩隊比賽早段回到同一起跑線,兩隊互相壓迫,戰況激烈而火藥味濃烈,比賽第25分鐘,雙方已各有7次犯規。

調整見效
塞內加爾今場加強壓迫,效果顯著,埃及上半場多次以高波長傳越過對方壓迫,但難以連結進攻重心沙拿。

相反地,塞內加爾今場嘅調整,令球隊組織效果有所提升。比起首回合,球隊今場更着重左路組織,多次嘗試overload左路。球隊左路嘅組織配合,多次落到底線甚至滲入halfspace位置, 可見其鋭利度更勝首回合上半場主打嘅右路。左路更加銳利嘅進攻,加上右邊I.沙亞同B.沙亞兩位沙亞牽扯住對方防守,令埃及不得不增加回防幅度同人手,因此塞內加爾今場大部份時間得以壓住埃及。

一加一減
埃及今場相對處於劣勢,不過下半場曾有機會。15分鐘半場休息令體力有所恢復,埃及下半場早段藉此發力增加向前壓迫,同時更多嘗試以地波組織,令球隊同對方打成均勢。

68分鐘,塞內加爾主教練施斯決定調動,以正前鋒迪亞尼入替擔任中場嘅B. 沙亞。施斯嘅調動,目的或係增加前場嘅接應點,令攻勢更直接。不過,實際上其調動卻帶來反效果,因中場對抗嘅人手減少。同一時間,埃及主教練卡路士選擇連換三人,三個對位換人,令埃及體能得到補充,而對抗強度隨之而來。塞內加爾中場對抗削弱,而埃及對抗強度得到補充,一加一減之下埃及佔據優勢,並製造出兩次機會,可惜施素兩次攻門都僅僅斜出。

重奪優勢
埃及嘅優勢直至81分鐘,施斯連換兩人。其中之一,係以中場P.基爾入替正選箭頭迪亞,令球隊轉回433陣型。調動過後,塞內加爾中場對抗能力回升,得以重奪優勢。埃及從下半場開始發力,大量消耗體力過後,由下半場尾段至到加時階段都係處於「挨打」狀況。文尼同I.沙亞多番製造機會,但往往只差最後一關。埃及門將艾沙拿維發揮同非洲盃決賽時嘅加保一樣神勇,屢救險球,將比賽帶入互射十二碼階段。

贏在籤運
講到互射十二碼,塞內加爾球迷嘅雷射燈成為勝負關鍵,埃及嘅沙拿、施素、同穆斯塔法穆罕默德因而射失。兩回合比賽中,主場球迷都有以雷射燈照射客隊球員。不過,關鍵在於運動戰之中球迷用雷射燈追住球員,對球員造成影響嘅難度較大,而互射十二碼階段中,埃及球員係企定定被照射,幾步助跑嘅方向亦必然係向住皮球,球迷好容易就可以用雷射燈干擾對方球員。若果次回合係於埃及主場舉行,同樣以互射十二碼決勝,相信結果會係相反,塞內加爾今場可算贏在籤運。

說服力
雖說塞內加爾今場贏在籤運,不過以兩回合運動戰之中嘅表現而論,小弟個人認為塞內加爾比埃及更接近贏波,塞內加爾晉級世界盃說服力更強。

如果喜歡我們的文章,請即分享到︰

標籤: 世界盃  塞內加爾  埃及  沙拿  文尼  

留言


請按此登錄後留言。未成為會員? 立即註冊
    快捷鍵:←
    快捷鍵:→