今晚十一點！世界盃決賽！「潘柏斯雄鷹」阿根廷對決「高盧雄雞」法國！美斯最後一場世界盃比賽，最終會由「球王追夢隊」圓夢，抑或由法國嘅人才打破60年以嚟，無人衛冕嘅局面？🇦🇷🇨🇵
阿根廷戰術安排靈活，今屆唔會盲目重用美洲盃冠軍主力。分組賽過程之中，以史卡朗尼為首嘅教練團隊逐漸確立人選，麥亞里士打、安素費蘭迪斯同迪保羅成為中場主力。到淘汰賽階段，球隊跟隨荷蘭轉三中堅陣，其後跟隨克羅地亞踢442，兩次以其人之陣還治其人之身，當中贏嘅係球員實力較平均，而且有美斯嘅引領。
🇦🇷🇨🇵
不過，今次對住猛將如雲，球員平均個人能力較強嘅法國，阿根廷似乎唔適宜跟隨對方排433陣。使用面對荷蘭所用嘅532，或會更適合。面對法國銳利嘅兩翼，球隊需要翼衛同中堅嘅包夾，有三位中堅面對對方傳中會更穩陣，三位中場亦能更集中地令對方難以用遠程炮轟射。🇦🇷🇨🇵
講到法國，賽前消息可謂煙霧瀰漫，煙幕彈處處，難分真與假，所以小弟搵嚟各大統計網站嘅人員預測供大家參考 (喺圖度)。
🇦🇷🇨🇵
不過無論如何，法國進攻火力強大，甚至比四年前奪冠時更強。主要因為極具進攻才華嘅基沙文，成功轉型成中場，進可引領攻勢，退可守住小禁區。值得留意嘅係，若果麥巴比喺左翼，佢需要更多參與防守，否則左中堅同左閘菲奥包圍美斯時，對方右路後上，曾攻破荷蘭大門嘅摩連拿將有機可乘。
🇦🇷🇨🇵
今場估計兩隊傾向穩中求勝，靠整體戰術同力量穩守，相信令節奏較慢。進攻方面還看球員間嘅配合同發揮，即係睇下美斯屈到機，定係法國衝擊轟炸成功。
🇦🇷🇨🇵大家認為今晚邊隊會成為冠軍？
請按此登錄後留言。未成為會員? 立即註冊