世界盃外圍賽四強丨賽後文章 : 意大利兵疲累之下速率輸蝕 北馬其頓搏命死守創造奇蹟 (意大利 0-1 北馬其頓) 精選

世界盃歐洲區外圍賽，北馬其頓以一球遠射絕殺淘汰歐洲冠軍意大利，創造奇蹟。意大利就連續兩屆無緣世界盃決賽週。
雙方陣容:

比賽戰況
今場比賽意大利長時間佔據優勢，面對北馬其頓將隊形收後，可以見到球隊能夠以左路配合滲入禁區製造機會，唯上半場右路對對方後防嘅拉扯較少。
北馬其頓今場大部分時間全軍退守，偶爾於中後場壓迫。防守嘅時候，大部分球員都會收入自己禁區，球隊形成極其密集嘅防線。意大利不論於陣地戰抑或快攻當中，都曾經突破北馬其頓防守攻入禁區，但北馬其頓球員補位/回防速度快，因而往往能封阻對方嘅射門。今場意大利有32次射門，當中有一半(16次)都係被北馬其頓封阻。

意大利並非無明顯機會，上半場對方門將傳球失誤，但比拉迪射門軟弱無力，未能把握。文仙尼下半場作出調整，安排球隊增加右路進攻，但仍受制於北馬其頓球員拼命嘅防守。到比賽嘅補時階段，泰哥夫斯基一次遠射絕殺，意大利就此落敗。

速率成關鍵
意大利今場表現嘅速率較低，正正被運作速率較高而搏命死守嘅北馬其頓剋住，造成意大利攻勢同射門不斷被封阻嘅情況。意大利嘅速率問題好可能同體能有關，意大利球員由上季球會比賽，到歐國盃、今季球會比賽、歐國聯同世界盃外圍賽，除幾場球會嘅季前賽外，幾乎馬不停蹄，導致疲累不堪。今場意大利將帥可以做嘅都有做，但可惜最終事與願違。
再次失落
歐洲冠軍意大利轉眼無緣世界盃，彷彿從天堂跌落地獄，相信球迷們對此事嘅印象會無比深刻。不過，小弟希望大家亦唔會忘記，意大利贏得歐國盃冠軍時嘅風彩，當時球隊一改保守嘅傳統踢出悅目嘅組織，以默契、配合、士氣、新老結合等團隊元素創造歷史。意大利曾經喺三年間從無緣世界盃嘅低谷走上歐洲球壇嘅巔峰，如今球隊再次失落之時，希望眾將能參考球隊自身嘅經歷而振作起嚟，他日再捲土重來。

搏盡無悔
北馬其頓喺歐國盃分組賽三戰全敗出局，今場賽前，相信冇咩人會認為球隊能擊敗歐洲冠軍意大利。不過正所謂「搏盡無悔」，唔搏過，就真係唔知有冇可能會贏，而今次北馬其頓真係贏咗。無論球隊最終能否成功入圍世界盃決賽週，相信大家都唔會忘記佢哋所創造嘅奇蹟。