〔英超: 韋斯咸 3-2 利物浦 賽後文章〕韋斯咸發揮良好 爭議之中打破金身 利物浦有所調整


英超第11輪嘅比賽,韋斯咸於主場以3-2打破利物浦不敗金身,同時於聯賽榜壓過利物浦,升上第三。

雙方陣容:

⚒️🔴爭議入球
比賽第4分鐘,韋斯咸就憑角球打開記錄,然後入球過程中,爭頂頭槌嘅奧邦拿有衝撞門將嘅犯規嫌疑,可以見到奧邦拿爭頂時係向後跳(即向艾利臣),其後撞到對方,從而令艾利臣未能接到皮球,皮球於手邊溜入網,韋斯咸領先。

奧邦拿同艾利臣接觸過程:

⚒️🔴犯規爭議
韋斯咸領先不久,左閘基士維防守軒達臣時,其飛鏟攔截踢中皮球後未有收腳,右腳踢中軒達臣膝頭,而左腳鞋底向前但未踩到軒達臣。雖然基士維未有踩中軒達臣,但其右腳踢中膝頭亦有機會令軒達臣受傷,根據球例中嚴重犯規嘅定義,"A tackle or challenge that endangers the safety of opponent" ,球證可以俾基士維紅牌。最後球證未有判罰紅牌,或許因為其接觸面未算太大,而軒達臣最終亦未有受傷。

基士維爭議動作:

🔴利物浦有所調整
利記落後之下,壓前搶攻,而韋斯咸領先後主要以防反應戰。利記於主攻陣地戰當中,進攻方法有所調整。今場利記較少依靠右路沙拿、軒達臣、阿諾嘅三人組合壓上滲入禁區,更多以文尼同羅拔臣於左路衝擊。高普及其團隊安排調整進攻方法,可能係希望令右路防守更加穩定,以防被對方步大力雄而速度快嘅安東尼奧針對。上述調整有利於球隊防守以及控制比賽,不過同時隊中最強進攻沙拿所得嘅支援明顯減少。

利物浦今季進攻分佈:
今場兩隊進攻分佈:

⚒️🔴欠攻不下
韋斯咸嘅防守強度高,兩位中場賴斯同蘇捷掃蕩力強,其中賴斯作出了5次成功攔截佔全隊(8次)超過一半,加上兩翼保雲同賓哈馬勤於回防,令球隊能於中場抵抗利記攻勢,減低後防壓力。利記左路突破有一定效果,但欠缺了擅於回後引領攻勢嘅「假9號」費明奴,球隊創造到嘅機會較少,具威脅嘅埋門不足,上半場只能靠罰球攻勢,阿諾射門彎入追平1-1。

⚒️🔴再次領先
下半場利記搶攻爭取領先,韋斯咸繼續防反。到下半場中段,利記嘅壓迫力隨體能下降,韋斯咸嘅反擊越來越多。67分鐘嘅一次反擊,保雲突破利記三人包夾嘅壓迫,助攻科拿斯入球令球隊再次領先。

韋斯咸反擊入球過程:

74分鐘,韋斯咸角球攻勢,蘇馬插入遠處,阿諾未有上前以身位封阻其插入線路,蘇馬頂成 3-1。

韋斯咸角球入球過程:

⚒️🔴變得困難
韋斯咸手持兩球優勢,莫耶斯安排球隊收縮防守力保不失,而落後嘅利記再要面對密集時,兩翼因體力下降,減少了衝擊邊路,開始更多留守中路等待機會,同時減少從邊路回防嘅跑動距離。缺少了左右兩邊拉扯對方防線,利記就算有用球非常細緻堤亞高入替張伯倫,滲入禁區亦變得困難。最後,奧歷治同南野拓實後備入場,久攻至83分鐘,奧歷治一控轉身一射追近成3-2。入球雖然未能平反敗局,但顯示了奧歷治狀態良好。
⚒️🔴總結
今場韋斯咸嘅勝利,無可否認帶有爭議,但兩隊發揮亦同樣係關鍵。韋斯咸防守堅固,反擊有效,發揮良好。而利記有因應對手而作出調整,可惜受傷兵問題影響了發揮,加上遇到尺度非常寬鬆嘅球證團隊,而判決不利球隊,令金身最終被破。

韋斯咸於英超第11輪過後排名第三,予人驚喜。而利物浦受傷兵問題影響,經過上月開始嘅連場大戰,球員或會出現疲態,接下來嘅國際比賽周,高普及其團隊或要考慮作出調整。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→