〔英超: 曼聯 0-5 利物浦 比賽描述評論〕利物浦表現完全針對曼聯弱點 曼聯踢少一人之時表現似乎更好 蘇帥再次得到提示

英超首循環嘅雙紅會,曼聯主場面對利物浦,慘吞五蛋,奧脫福慘成「惡夢劇場」。

👹進攻火力難有發揮
今場蘇斯克查繼續以 4231陣型應戰,C朗、拉舒福、格連活同般奴四人組合嘅進攻火力能喺一開波般奴射高嘅反擊中可以見到。不過,其火力大部份時間都未能發揮,利物浦壓上對攻時,曼聯中後場未有足夠人力抗衡,漏洞百出,處於劣勢,四人組合難有發揮。

👹曼聯欠缺整體性,利記輕鬆入波
曼聯防守欠缺整體性,前場四人壓迫力度不足,未能保護人數較少嘅中後場。利記運作同配合既流暢又快速,往往能越過曼聯前場壓迫,擺脫兩位防中麥湯費特同防線四人嘅防守。如第5分鐘,祖達同費明奴嘅快速串連輕鬆越過曼聯防中,麥佳亞同梳爾先後補位,拿比基達插前如入無人之境,沙拿接球連帶轉身,助攻基達打開記錄。

👹邊路接近崩潰
其後曼聯未見改善,防中人數不足,加上前場四人缺少回防支援,左閘梳爾往往要走入中路幫手 (失第二球前仲要被麥佳亞mark住),令邊路往往露出大量漏洞,接近崩潰,接連被阿諾後上助攻祖達射入、基達右路插前助攻沙拿入球、沙拿偏右大位撞射入網。迪基亞愛莫能助,利記半場遙遙領先四球。

👹🔴形成運作對比
下半場,蘇斯克查以普巴入替格連活加強中場,但中場運輸隨即失誤,同利記流暢嘅運作形成對比。軒達臣得到皮球,用腳背放一個靚直線助攻沙拿單刀射成0-5。
👹踢少一人嘅時段成為提示
61分鐘,普巴鞋底踩中基達被罰紅牌,曼聯踢少一人之下,轉三中堅陣531打防反。曼聯防守人數足夠覆蓋中後場之下,雖然對方稍有收力,但起碼未能如上半場般輕鬆滲入後防。球隊亦有零星反擊,製造了三次射門。雖然踢少一人,但當曼聯陣型同踢法比較合理嘅時候,効果似乎更好。

之前以三中堅打大戰挽救帥位嘅往績,加上今場三中堅陣時段嘅表現,一再提示蘇斯克查,未來幾場大戰係時候改變了。

而利記方面,球隊今場創造了一場經典嘅比賽。球隊嘅壓迫、配合、運轉速率、緊密度等表現維持喺極高嘅水平,完全針對到曼聯中後場嘅弱點。雖然今場曼聯中後場崩潰係一大重點,但同時利記亦不乏亮點 :
🔴新加盟而少有出場嘅中堅高拿迪表現帶來驚喜,足夠硬朗,係雲迪克另一個好拍檔。
🔴門將艾利臣化解了曼聯僅有嘅機會,力保不失
🔴兩閘羅拔臣同阿諾展現了強大助攻力
🔴沙拿維持狀態大勇,繼2003年嘅朗拿度之後,成為第二個作客奧脫福帽子戲法嘅球員,亦成為英超史上入球最多嘅非洲球員,恭喜!
🔴費明奴同祖達狀態良好,文尼得到了休息。
🔴中場表現出色,可惜嘅係米拿同基達分別受傷,希望兩人早日康復。
🔴高普下半場踢多一人之時,安排球隊控球在腳,繼作客馬體會後再次於大戰中保留體力,對球季長跑而言非常着數。

如果喜歡我們的文章,請即分享到︰

標籤: 英超  曼聯  利物浦  蘇斯克查  高普  C朗  沙拿  基達  梳爾  祖達  

留言


請按此登錄後留言。未成為會員? 立即註冊
    快捷鍵:←
    快捷鍵:→