〔英超短評 : 車路士 0-1 曼城〕曼城稍稍「收力」時效果更好 車路士受傷兵問題限制


英超大戰,歐聯決賽翻版,車路士再戰曼城,今次哥迪奧拿成功帶領球隊「復仇」,作客史丹福橋以0-1取勝。

今場曼城擺出433陣型,以一貫主攻姿態應戰,今次有出防中洛迪。而車路士延續了上場對熱刺下半場取勝嘅陣型352。

⛵🦁早段戰況緊湊,入球機會難得
上半場早段曼城大部份時間壓住車路士,主攻陣地戰之中,兩翼拉邊足夠,貝拿度施華同迪布尼嘅串連良好,但面對車路士三中堅三中場中極其緊密嘅防守,曼城始終未能攻入對方halfspace,唯獨14分鐘一次滲入左邊halfspace。

車路士經歷連場大戰,體能上難以似上場壓制熱刺般壓制曼城,所以比較保守,以防反應戰。車仔防守方面因投放了大量人手而極其緊密,但相應地,只有盧卡古同雲拿兩個反擊點,衝擊力不足,難以牽制對手同製造足夠反擊機會,只有15分鐘一次具威脅嘅反擊,雲拿推進到禁區偏左左傳到門前,盧卡古未能接應。
曼城稍稍「收力」,效果更好
30分鐘左右,曼城減少前場壓迫力度,較多留守中場。車路士開始更多嘗試主動進攻,可惜占士於 29分鐘傷出,缺少了右路後上嘅衝擊力。此時,車仔防線身後相對有了較多空間,上半場尾段,曼城以簡單直接嘅長傳,製造了迪布尼同捷西斯兩次禁區內嘅機會。

⛵🦁「耶穌」入球,車仔久守必失
下半場,曼城成為主攻一方,車路士繼續防反。52分鐘一次角球攻勢,「耶穌」捷西斯以個人技術轉身射門省中佐真奴改變方向入網,曼城領先0-1。入球帶有運氣,戰術成分較低,只可以話車仔不幸久守必失。
曼城做法同上季擊敗巴黎時相似
曼城領先後嘅應對方法就如上半場一樣,將隊形稍稍收後至中場位置,阻止對方將球運上前場,同時爭取反擊機會,其做法同上季擊敗巴黎時相似。曼城嘅反擊具有威脅,不乏拉開比數嘅機會。

🦁車仔被傷兵問題限制
車仔落後之下壓上務求反撲,兩隊互相對攻,各有機會。不過,車仔被傷兵問題限制,上半場占士傷出,加衝擊力較強嘅曼治同佩利錫因傷缺陣,簡迪容易受傷,因此杜曹只能以夏維斯入替簡迪,轉陣成343,進攻嘅衝擊力仍不及曼城。相比之下,曼城基亞利殊、迪布尼、捷西斯、科頓所製造嘅快攻/反擊更加銳利。

最後,車仔未能入球,曼城差少少拉開記錄,比數最終維持於0-1。雖然曼城贏波靠嘅係運氣加個人能力嘅入球,但今場整體而言,曼城進攻嘅效果較好,今場勝仗具有說服力,係「地獄賽程」嘅好開始。而車仔方面,季初連場大戰後,接落嚟一個月嘅賽程(除歐聯作客祖雲達斯外) 相對輕鬆,會係回氣嘅好時機。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→