〔英超短評 : 熱刺 1-0 曼城〕把握力成為勝負關鍵 基亞利殊令人期待 哈里簡尼若果離開熱刺 其工作將有人繼承


2021-22球季英超首輪大戰,熱刺主場一球小勝曼城。

比賽早段開始,熱刺主打防反,比賽主要係曼城主攻嘅陣地戰。

基亞利殊能適應曼城踢法
新加盟曼城嘅基亞利殊今場正選上陣,擔任偏左中場,其盤扭突破製造唔少威脅,5次製造對方犯規屬全場最多,曾制造根杜簡禁區邊罰球機會。而配合方面,基亞利殊亦開始能融入曼城進攻體系,例如下半場插入halfspace 射門,以及今場幾次同史達寧交叉走位,幫助拉開空間,可見基亞利殊能適應曼城整體組織嘅踢法,曼城球迷未來可有更大期待。

把握力成勝負關鍵
陣地戰之中,曼城兩翼史達寧同馬列斯拉邊之下,製造唔少機會。曼城今場既expected goal數據為2.3球,高於對方(1.08球)一倍有多,可見其進攻效果比熱刺更勝一籌,可惜把握力卻被熱刺比下去,馬列斯同費倫托利斯先後失機,係勝負嘅其中關鍵。

哥帥或許過於進取
哥迪奧拿今場排陣進取,中場三人之中,基亞利殊明顯屬進攻球員,根度簡偏向進攻型,防守力一般,曼城只有費蘭甸奴一名防中。當曼城前場壓迫力度隨體能下降,熱刺便有唔少反擊空間。大戰之中,此陣或許過於進取。

熱刺前線新組合
熱刺新領隊紐奴排出433陣型面對曼城,曼城早段連番嘅攻勢過後,熱刺反擊機會越來越多,亦能將陣營稍為推前。哈里簡尼缺陣之下,熱刺前線三人為比亞芬、孫興慜以及盧卡斯嘅組合,今場球隊反擊速度比哈里簡尼在陣時快,前線三人能提供足夠牽制力,多次以反擊製造威脅。

雖然哈里簡尼缺陣之下,球隊打快攻/反擊嘅快速衝突點更多,但前線分工需重新分配。孫興慜原因除衝擊防線外,繼承了哈里簡尼部分工作如支點、罰球處理等,而比亞芬同盧卡斯輪番引領反擊。今場三人默契尚未完全建立,反擊組織當中,可見幾次錯過傳球時機嘅畫面,熱刺最後都係憑孫興慜個人發揮,左腳遠射入球取勝。雖然熱刺進攻效果未到最好,不過若哈里簡尼離隊,比亞芬、孫興慜以及盧卡斯嘅三人組合培養默契後嘅發揮,值得期待。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→