〔英超短評 : 利物浦 1-1 車路士〕 杜曹應對措施加上球員拼搏力保不敗 利物浦還可有更多板斧 但進攻人員深度確實不足

英超第三輪大戰,利物浦主場迎戰車路士,兩隊以1-1握手言和。
中場爭奪
上半場戰況緊湊,兩隊中場搶奪非常激烈,務求以快攻/反擊爭取入球。當中利記相對進取,第10分鐘阿諾長傳製造了軒達臣小禁區前嘅機會。一番拉鋸後,車仔於22分鐘嘅角球攻勢,夏維斯攝前柱高難度頭鎚攻門,皮球笠過艾利臣遠處入網,車仔領先。

利記不時以後場長傳打車仔防線身後嘅空間,車仔門將文迪覆蓋範圍足夠,能出迎到禁區外化解攻勢。

防守盧卡古方法
盧卡古回歸英超,立即壓倒阿仙奴兩名中堅,其中經常緊貼盧卡古嘅馬里更吃盡苦頭。利記兩位中堅雲迪克同馬迪普今場防守方法同阿仙奴中堅有明顯分別,兩人較少與盧卡古進行身體對抗,更多讓其持球,再尋找時機攔截/踢走皮球,效果良好。35分鐘,馬迪普一次防守過早緊貼盧卡古,便被轉身推過,形成曼治半單刀機會,可見一個錯誤足以讓盧卡古帶來威脅。

判決爭議
今晚嘅轉拆點,係完半場前嘅角球,文迪同阿朗素因誤會而爭球,導致未能解圍,形成混戰,門前嘅占士面對文尼嘅射門時手球犯規,被罰全餐 (十二碼+紅牌),沙拿操刀追平。

對此有人認為球證安東尼泰萊判罰過嚴,罰十二碼+黃牌已經足夠。不過,今次占士於門線阻止了明顯入球機會,若果係手球就必定要判罰全餐。今次占士手部於不自然嘅位置,擴張了防守面積,而手部擋到皮球,屬於手球犯規,球證確實要判十二碼+紅牌。

反而,球證安東尼泰萊其他判決尺度並不一致,對於於自己半場防守一方嘅身體接觸非常寬鬆,但同時對向前壓迫嘅身體接觸明顯嚴謹。於上述情況中,較主動壓迫嘅一方利物浦 (尤其下半場),會受較大限制,造成今場利記犯規13次,遠高於車仔嘅4次。

杜曹應對見效
面對半場踢少一人嘅困境,杜曹以堤亞高施華入替夏維斯,以其經驗指揮後防,再以高華錫入替簡迪,補充體能之餘亦增強守轉攻嘅傳送能力。車仔下半場大部份時間只能收縮,但當得到死球,球員亦會嘗試湧上爭取入球。杜曹嘅應對措施,加上球員盡力死守,最終力保不敗。

板斧未能用盡
利記整個下半場踢多一個人,10人應戰嘅車仔欠缺前線牽制力之下,利記絕大部份時間處於主攻陣地戰。沙拿文尼兩翼拉邊之下,多次組織攻勢亦但一球不入,可見利記破密集能力有限。可以理解嘅一點係羅拔臣剛傷癒復出,未能為左路提供強大嘅助攻力。

不過,利記若有泰亞高或基達坐陣,組織該會更加細緻,或會有更多進攻板斧,其效果可以更好。實際上,高普今場亦有於74分鐘換入泰亞高,但當時嘅沙拿文尼體能已經下降,減少了拉邊。未能拉開空間之下,進攻效果未能提升,球隊最終未能取勝,反映了以下問題。

進攻球員深度不足
上半場祖達入替受傷嘅費明奴後,當沙拿文尼體能下降,進攻効果隨之下滑時,已無具有大戰級數嘅前線後備,反映了陣容厚度不足。面對英超中下游球隊,高普還可以信任奧歷治以及南野拓實,不過於大戰之中,兩人實力的確未算充足,若只靠「埃及祖文明」四人支撐,隨英超大戰、國際賽(包括將於冬天舉行嘅非國盃)、歐聯死亡之組賽程嘅消耗,相信季中開始,四人將難以維持穩定表現,令球隊進攻火力將會減弱,情況對利記於英超聯賽嘅長跑,相當不利。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→