〔歐國盃: 英格蘭 1(2)-(1)1 丹麥 比賽描述評論〕英格蘭組織有曼城影子 要繼續提升心態以及把握力 丹麥球員今屆熱血為兄弟而戰 值得掌聲

歐國盃第二場四強比賽,英格蘭於溫布萊球場,加時以2-1擊敗丹麥。
英格蘭組織有曼城影子
比賽早段節奏適中,兩隊互有攻守。英格蘭以其組織力製造機會,方式上包含球員位置嘅輪轉,有曼城嘅影子。第5分鐘嘅快攻,哈里簡尼走到右路傳中至小禁區前,史達寧僅未及接到。12分鐘,曼治到右路同沙卡換位配合,滲入禁區底線。

修夫基用人精準,限制對手
丹麥今場繼續以快攻/反擊形成威脅,修夫基於右閘位置安獲加正選,以其速度限制對方快攻/反擊,亦幫助隊友補位。例如第9分鐘,丹麥三角短傳越過麥佳亞同史東斯,獲加隨即衝向中路補位避免對方形成單刀機會,可見修夫基用人精準。
中後場球員顯得緊張
英格蘭前場發揮良好,但部分中後場球員上半場顯得緊張。15分鐘,菲臘斯失誤被靴爾保搶走皮球,丹麥前場反擊中靴爾保射門被碧福特接到,碧福特用手直接將波碌到對方腳下,形成丹麥另一次機會。30分鐘,曼治同梳爾連續兩次心急犯規,丹麥前場罰球,由丹斯加特射入破網。

英格蘭仍能發揮其組織能力
落後之下,英格蘭進攻球員仍能保持心態,繼續發揮其組織能力,先有36分鐘沙卡右路拉邊,傳球俾插入halfspace 嘅哈里簡尼製造史達寧近門機會,被表現神勇嘅舒米高救出。不久之後,哈里簡尼拉後迎球,送直線俾右路斜插嘅沙卡,沙卡傳到龍門囗,丹麥隊長卡積亞無奈之下入烏龍球,英格蘭扳平。

丹麥球員熱血值得掌聲
丹麥從分組賽開始,就一直馬不停蹄。無論打防反抑或壓迫搶攻,丹麥一直用較多體能維持其隊形緊密度。不過到四強階段,球隊體能問題漸漸浮現,下半場難以與英格蘭抗衡,只能收縮防守。但不得不讚球員們嘅毅力,守至加時 104分鐘,僅被一個爭議入球擊敗。
丹麥隊將艾歷臣嘅事件化為動力,球員們熱血地為兄弟而戰,最終能殺入四強,值得大家嘅掌聲。

十二碼判決似乎過嚴
104分鐘嘅十二碼當中,史達寧被包夾後跌倒,犯規動作嘅接觸唔算大,但確實有出腳攔截而且未能先踢中皮球,球證確實可以判犯規。不過,今次十二碼嘅判決標準有如上季季初,只要防守球員下半身接觸到進攻球員,而進攻球員倒地,基本上會判十二碼,放於今屆歐國盃,似乎過嚴。
要繼續提升心態以及把握力
雖然英格蘭憑具爭議嘅十二碼晉級決賽,但從比賽形勢以及所創造嘅機會而言,英軍嘅勝利仍有足夠說服力。去到決賽,眾將姥!嘅心態要更加穩定,尤其中後場球員,若以具大賽經驗嘅軒達臣擔任正選,指揮中場,相信可以提升心態方面,另外,亦要把握好入球機會,將足球帶回家。

留言


請按此登錄後留言。未成為會員? 立即註冊
    快捷鍵:←
    快捷鍵:→