〔歐國盃: 法國 1-0 德國 比賽描述評論〕法國以抗衡力同速度取勝 德國進攻火力可以更強

歐國盃死亡之組大戰,德國主場迎戰法國。戰況緊湊下,法國以一球小勝。
早段集中中場搶奪,法國取得優勢
開賽早段,兩隊將隊形收緊,集中於中線壓迫,爭取控球權以發動快攻/反擊。於兩隊激烈嘅搶奪之中,抗衡力同速度係其中關鍵。法國隊整體速率、對抗同覆蓋範圍比德國優勝。另外,麥巴比快速推進以及兩閘靴南迪斯同柏華能壓住德國兩位翼衛甘美治同高辛斯,令法國取得優勢,製造較多機會,包括15分鐘柏華右路插上傳中入小禁區,以及20分鐘嘅入球,該入球概括了上述抗衡力同速度嘅元素,先有普巴以一敵二嘅護球(抗衡力),再有柏華插前幫波,其後靴南迪斯左路插前(速度)接應普巴長傳製造侯姆斯嘅烏龍球。


德國落後一球下主攻效果一般,法國反擊具威脅
法國領先後收縮防守,德國壓前主攻。德國三中堅陣面對密集有變形安排,右中堅真特會移到右閘位置,幫助右翼衛甘美治上前,但兩人突破力有限,右路進攻威脅不足。而左路方面,左翼衛高辛斯有一定突破力,但未有進攻點拉左邊,支援不足,制造到嘅威脅有限。至於中路方面,德國人手似乎過多,今空間更加狹小。功能方面,梅拿同哈伐斯嘅功能相似,前線只有基拿比一人衝擊對方防線,面對簡迪以及其身後嘅防線,難以滲入。德國只能靠高波製造機會,而德國欠缺高大嘅傳中接應點,制造到具威脅嘅機會有限,例如37分鐘左路傳中俾基拿比做高難度倒掛支點形成根度簡射門。

相反,法國主守之下有兩次反擊機會,包括35分鐘麥巴比推過候姆斯到禁區底線傳中,以及41分鐘賓斯馬中路插入禁區接應長傳,但其狀態似乎尚未回復,未能控好再射門。

下半場拉鋸之中,梅拿拉右邊有一定效果
下半場比賽格局維持於德國主攻,法國防反。雙方你來我往,51分鐘,法國嘅反擊中拉比奧特插入偏左射中柱。54分鐘,德國左路傳中,甘巴比判斷皮球落點,基拿比射門僅僅高出。梅拿下半場更多到右路幫手,有一定效果,56分鐘先拉右邊再插入中路十二碼點附近射門,亦製造到基拿比插入中路直面門將嘅機會,但被羅利斯快一步接到皮球。

法國體能下降較快,德國無功而返
下半場中段,主守嘅法國體能下降較快,失誤增加,其中普巴幾次推失同傳失,德國得以壓住法國。此時法國仍偶有反擊,包括麥巴比爆過侯姆斯,差少少形成單刀,侯姆斯準確嘅飛鏟僅僅化解,以及其後賓斯馬嘅反擊炸糊。比賽尾段德國教練路維以雲拿同辛尼入替哈伐斯同基拿比,打法不變,欠缺快翼拉邊之下難以攻破法國嘅密集防守,最後無功而返。

法國於歐國盃有漂亮開局
法國今場以一直沿用嘅防反打法取得呢場大戰嘅勝利,於歐國盃嘅征途有一個漂亮嘅開局。只不過有一點值得討論,教練迪甘斯於89分鐘先進行第一個換人,增加因體能下降而失球嘅風險。

德國進攻火力可以更強
而德國方面,正選嘅梅拿同哈伐斯功能相似,兩人亦集中於中路活動,令1+1嘅效果少於2。而且面對密集欠缺兩翼拉邊,難以製造威脅。若果以拜仁雙翼基拿比同辛尼正選,梅拿於中路擔任「假9號」引領攻勢,球隊速度同牽制力將會更強,而面對密集可以讓兩翼拉邊,右邊嘅甘美治轉到防中位置,德國進攻效果相信可以更好。接下來德國面對匈牙利同葡萄牙,至少要一勝一和先可以出線,匈牙利密集防守甚為堅固,葡萄牙主帥山度士一向保守,德國必須提高面對密集嘅威脅。
標籤: 歐國盃  euro2020  法國  麥巴比  德國  梅拿  

留言


請按此登錄後留言。未成為會員? 立即註冊
    快捷鍵:←
    快捷鍵:→