〔歐國盃: 比利時 1-2 意大利 比賽描述評論〕意大利運轉速度取勝 比利時早段踼防反未必係最好選擇

歐國盃八強,比利時大戰意大利,經過激烈嘅對碰,最終意大利以1-2勝出。
今場比利時繼續以三中堅 343應戰,而意大利亦繼續使用 433陣型。

比利時防反具有威脅,意大利有發揮空間
比賽早段,比利時打法以防反為主,意大利相對進取。比利時有三位中堅之下,收縮防守足夠緊密,意大利難以滲入對方禁區。進攻方面,比利時反擊/快攻具有威脅,早段有快翼杜古左路突破橫傳中路,其後迪布尼兩次引領反擊,推上前場,分別制造自己以及盧卡古於禁區頂中路嘅兩次射門。意大利面對兩次攻勢力保不失,要靠門將當拿隆馬出色嘅表現。

意大利有較多控球時間,以發揮純熟嘅組織配合,雖然面對對方三個中堅,但亦能創造機會,例如27分鐘左路配合製造空間俾恩斯尼大位遠射。

意大利運轉速度有優勢
31分鐘,意大利前場快開罰球,華湯根解圍失誤,上前壓迫嘅華拉堤俾波巴利拿用速度以一敵二,打開記錄。落後一球之下,比利時必須更加進取,不過意大利整體行軍速度有優勢。比利時壓上之下,意大利有更多機會以快攻/反擊攻擊比利時行動較慢嘅「百歲防線」。44分鐘,恩斯尼擺脫泰利文斯後,遠射彎入遠處,2-0。入球過程中,比利時中堅艾達韋列特同華美倫兩人看管恩斯尼,但未有上前補位施加壓力,可能同移動或者反應速度有關。

比利時小將成為奇兵
比利時整體行軍速度不及意大利,但馬天尼斯今場派出小將杜古以速度突破左路,結果未有令人失望。完半場前杜古左路爆過羅倫素搏得十二碼,盧卡古操刀追近1-2。

下半場拳拳到肉
下半場戰況繼續緊湊,雙方互相打入對方心臟地帶,拳拳到肉。杜古左路幾次製造威脅,包括60分鐘同迪布尼配合,幫助其插入halfspace 再傳中,盧卡古射門僅被史賓拿蘇拿護空門。史賓拿蘇拿唔止於防守方面立功,進攻方面亦有威脅,65分鐘一次快攻,史賓拿蘇拿快速插入halfspace 空位射門僅僅斜出。

比賽變回陣地戰
下半場中後段,兩隊體能開始下降,意大利左翼衛史賓拿蘇拿受傷退下火線。比利時未能維持壓迫力強度,不過隨意大利亦因體能下降收縮,比利時成為主攻一方,但陣地戰中進攻效果一般,只能靠杜古內切遠射製造威脅。最後比數維持於1-2,意大利殺入四強。

防反未必係最好嘅選擇
比利時早段以防反取態應戰,形勢稍為佔優,但防反未必係最好嘅選擇。除左比利時嘅三位中堅,意大利嘅兩位中堅基亞連尼同邦路斯年紀亦偏大,動作同速度一樣較慢,而且中堅人數較少。開賽早段嘅快攻,盧卡古曾壓過基亞連尼形成機會。另外,今場比利時同意大利對攻之前係主守一方,體能消耗較快,令對攻時威脅下降。若於比賽早段,體能充沛時馬天尼斯選擇主動壓迫搶攻,或者球隊能製造到更多威脅,甚至搶佔先機。

今場大戰係意大利於歐國盃途程中嘅一大考驗,其勝利令球隊士氣大大提升。下場球隊將要面對西班牙,相信兩隊會對攻鬥組織,觀賞性令人期待。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→