〔歐國盃: 意大利 1(4)-(2)1 西班牙 比賽描述評論〕西班牙針對意大利弱點 表現爭氣 意大利遇最大考驗 憑速度與意志取勝

歐國盃四強大戰,意大利同西班牙鬥到十二碼階段。意大利最終勝出,晉級決賽。

比賽早段,兩隊大舉壓上,節奏奇快。西班牙從中取得優勢。

西班牙針對意大利弱點
西班牙教練安歷基今場收起正前鋒莫拉達,前線以三位翼鋒奧耶沙巴、奧莫同費倫托利斯為正選,以快速嘅壓迫針對意大利行動較慢嘅中堅兩老基亞連尼同邦路斯,從而令意大利後防多次要大腳解圍,難以控球。意大利運轉速度快,但只在於中前場,唔包括後防線。安歷基因而以強烈壓迫,阻止意大利打上前場,發揮中前場組織同運轉力,上半場意大利傳球成功率只有79%,明顯低於西班牙嘅90%。西班牙取得優勢下,表現優異嘅柏迪放直線入禁區,可惜奧耶沙巴未能控好,其後奧莫亦未能把握十二碼點附近嘅機會。

意大利未至於完全落在下風
意大利雖然被西班牙成功針對,但未至於完全落在下風。西班牙大舉壓迫之下,後線身後有唔少空間,當西班牙球員壓迫力隨體能下降,意大利反擊攻勢增加,上半場尾段,左閘艾馬臣打入對方禁區底線傳中,艾斯派古達僅僅閂到,皮球中柱彈出。

意大利減少壓迫
下半場節奏依然偏快,文仙尼安排球隊稍為減少壓迫,以保持隊形緊密。西班牙火力仍然強大,49分鐘一次快攻右路傳中,意大利右閘迪羅倫素門前解圍化解,其後另一次西班牙右路攻勢,布斯基斯射門僅僅高出。

布斯基斯有如雙刃劍
布斯基斯今場表現出色,有唔少精準嘅傳送,進攻方面能控制節奏,幫助球隊打上前場,防守方面亦有貢獻。不過,呢位西班牙隊長回防嘅問題,隨下半場體能下降,漸漸出現。60分鐘,意大利一次反擊,恩莫比利未能擺脫西班牙後防,後上嘅基艾沙推波入禁區大位射入,1-0。布斯基斯身為防中未有跟緊第二點插前嘅基艾沙,失球同布斯基斯嘅弱點有關。

莫拉達後備入場建功
入球後,意大利進一步收縮防線。安歷基先後以莫拉達同摩蘭奴入替費倫托利斯同奧耶沙巴,補充前線體能,以持續衝擊對方後防。西班牙落後之下繼續搶攻,80分鐘,莫拉達同奧莫一個撞牆配合,莫拉達插入禁區入球扳平。

西班牙體能消耗相對較慢
往後嘅時間,兩隊球員體能下降。今場之前西班牙連續兩場打入加時,比意大利多一次,賽前意大利體能應該較好。不過於比賽中,西班牙有更多時間控球在腳,體能消耗相對較慢,令加時當中兩隊都無體能優勢,互相拉鋸至互射十二碼階段。

意大利十二碼階段嘅優勢
十二碼方面,西班牙上一場對瑞士於互射十二碼階段晉級,而意大利今屆未有參與互射十二碼,西班牙嘅應對方法有可能已經被研究分析,而意大利嘅應對方法難以參考。最後,當拿隆馬救出莫拉達嘅射門,佐真奴穩定地射入,意大利以4-2勝出。

意大利遇最大考驗
今場意大利面對了今屆歐國盃賽程中暫時最大嘅考驗,球隊嘅弱點被西班牙針對,戰術上處於劣勢。不過憑住球員嘅速度同能力製造入球,加上中堅兩老頂足120分鐘嘅意志力,意大利最終都能夠晉級決賽。去到決賽,對方好大機會會參考西班牙今場大舉壓迫嘅踢法,文仙尼需要多加注意。

西班牙雖敗猶榮
而西班牙方面,由教練安歷基,到球員們,今場表現爭氣,可惜只差一點點。莫拉達建功迫和,但十二碼再次射失,奧莫表現非常稱職,但只差埋門一腳。西班牙今屆越踢越好,最後僅僅出局,雖敗猶榮,值得掌聲。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→