〔歐國盃短評〕 4個因素令葡萄牙未能完全發揮進攻火力

歐國盃死亡之組賽程中,葡萄牙作客以3-0擊敗匈牙利。以比數而言,今場葡萄牙算係大勝,但實際過程中葡萄牙贏得並唔輕鬆,球隊要同匈牙利拉鋸到84分鐘先憑運氣入球領先,其後再入兩球。有睇今場波嘅朋友,唔知有冇人同小弟有同一種感覺,葡萄牙進攻唔夠順暢,未能完全發揮其進攻火力。以下小弟將列出幾個當中嘅因素。

1.貝拿度施華被安排擔任右翼
貝拿度施華速度一般,今季於曼城多數踢中場中或者「假9號」,負責中路位置居多。今場貝拿度施華擔任右翼,未夠速度於突破,於邊路以傳中為主,般奴上半場於偏右位置幫手亦未有太大效果。另外,一次C朗搶到前場反擊分俾貝拿度施華,推進空間足夠,但其速度未能擺脫對方防守。

2.欠缺簡些路
歐國盃開鑼之前,簡些路因確診武肺而需要退隊。球隊欠缺簡些路之下,前線得到嘅支援減少,般奴需要更多到右路幫手組織,左邊速度較快嘅祖達所得到嘅支援較少。

3.下半場中段依靠高波組織上前
下半場中段,當葡萄牙球員體能下降,減少走動,攻中般奴亦會走到禁區停留,此時葡萄牙嘅陣型變成424,球隊似乎想簡單直接以高波打入禁區。葡萄牙擁有C朗同祖達兩位擅頂之人,高空攻勢係佢哋嘅武器。不過,當般奴於禁區時,葡萄牙欠缺進攻球員引領攻勢,令該段時間中後場同前線未能連接。

4.兩位猛將狀態未到最好
葡萄牙兩位進攻球員C朗同祖達嘅能力無庸置疑。但今場兩人似乎未到最佳狀態。C朗雖梅開二度,但上半場小禁區炒飛機嘅畫面,甚為罕見。祖達今場快速嘅推進並唔順暢,例如第4分鐘嘅反擊機會,祖達其實未能控制好皮球,係對方守衛接觸皮球後先再再產生機會。

雖然上述因素的確影響葡萄牙進攻方面嘅表現,但相信日後經過調整,佢哋嘅表現會有所提升。另外,簡些路缺陣之下,取而代之嘅施美度其實進攻上亦有貢獻,佢完半場前曾插入右路halfspace,助葡萄牙組織滲入對方心臟地帶。葡萄牙右閘位置組織力下降,但施美度速度比簡些路更快,後上插入侵略性更強,於快打快對攻嘅賽事,施美度會係適合人選。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→