〔歐國盃決賽短評〕修夫基臨場調動不當亦同賽前部署有關 十二碼安排混亂 既保守又要賭博

歐國盃決賽,意大利同英格蘭於法定時間踢成1-1,互射十二碼階段,英格蘭被意大利擊敗,屈居亞軍,足球回家夢碎。

臨場調動不當亦同賽前部署有關
賽後唔少球迷批評英格蘭領隊修夫基臨場調動不當導致落敗,英格蘭早段入球後收縮,令意大利受較少壓迫力之下發揮組織力,令後防不斷受壓,繼而失球被迫和。然而,太早收縮嘅決定可能亦包含賽前部署嘅問題。

修夫基今場以三中堅343陣應戰,同對德國嘅排陣一樣,人腳上只係以曼治取代沙卡,可見修夫基希望先集中以中/中後場壓迫,爭取快攻/反擊,穩中求勝。

誰不知,英格蘭開賽未夠兩分鐘便以一個漂亮嘅快攻,由梳爾入球領先。早段入球令英格蘭球迷相當驚喜,而相信修夫基亦都一樣。入一球後收縮可謂人之常情,相信亦係修夫基嘅部署。不過睇嚟,佢並無預備第二分鐘就領先嘅驚喜出現,賽前想入球後就轉用保守取態,全軍退守,於比賽第二分鐘領先都照做。維持本身嘅取態其實無害,除本身體能優勢外,更可以乘領先氣勢,爭取快攻/反擊拉開比數,可惜似乎於修夫基計劃裡並無此選項。

十二碼安排混亂
意大利於四強互射十二碼階段淘汰西班牙,其應對方法,英格蘭應該能夠參考,而碧福特確實能捉到方向,並撲出兩球。英格蘭比起意大利,應更有把握能於五球內擊敗意大利,修夫最後將史達寧同基亞利殊放到第八之後,太過保守了吧。另外,安排19歲小將沙卡,於最關鍵嘅第五輪主射,可謂出奇不意,但要求於阿仙奴不常射十二碼嘅沙卡負擔巨大壓力主射第五輪,絕對係極高風險嘅賭博。

至於臨尾換入拉舒福特同辛祖射十二碼,兩人未曾入局,球感亦無機會體驗,最後兩人同樣射失。
其實拉舒福特同辛祖能力方面,同正選嘅史達寧差距唔大,下半場或加時開始其實就可以作出調動,兩人其中一個體能充沛時入替比起留住體能下滑嘅史達寧,配合入替攻中嘅基亞利殊,效果可能更好,至少可以補充體能,提高速度,甚至可以入替速度進一步減慢嘅哈里簡尼,為何要臨尾先換入兩人?難道拉舒福特同辛祖同隊友默契完全唔夾?小弟淨係知道拉舒福特同梳爾嘅左路組合上季於曼聯已經多次為對手帶來威脅。

修夫基表現不佳,決賽落敗絕對有責任。呢位帶領英格蘭進步提升,帶來希望嘅領隊,如今成為罪人,未知能否保住帥位。不過肯定嘅係,今次落敗對於英軍來講係一個寶貴嘅經驗,無論修夫基繼續執教與否,相信英格蘭將於世界盃強勢回歸。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→