【你敢講我敢寫】第四講：阿古路與迪亞高哥斯達 精選

話咁快黎到第四講喇，有想睇既內容記得係fb search世界球壇俱樂部，like ＆ share個page之後pm我地你想睇既題目，咁我地就會開始寫架喇！
今次既內容係關於英超其中兩個最出名既鋒線球星，一個係效力車路士四圍惹事生非既西班牙鋒霸迪亞高哥斯達，另一個就係效力曼城令各方後衛膽顫心驚既阿根廷球星阿古路。

現年27歲既迪亞高哥斯達，佢既無球跑動、企位、頭槌、身體抗性同體能都係佢既強項，當然作為一個前鋒，佢既射手觸角真係極之敏銳，正因為各種既特點結合，造就左一個令人聞風喪膽既入球機器。好，去片先。

https://youtu.be/tFBvHgA0oiw(https://youtu.be/tFBvHgA0oiw)
雖然哥斯達係一個實力強橫既前鋒，但奈何佢既品格實在唔係個個接受得到，無論係對對手既尊重定係球員既品格行為都一直為人詬病。

https://youtu.be/-sSBU7G4GB4(https://youtu.be/-sSBU7G4GB4)
至於阿古路呢，相比起迪亞高哥斯達黎講，佢既腳下功夫比較細膩，好多時一對一都可以扭過防守球員之後再憑精湛既射術為呢個美妙既攻勢劃上一個完美既句號。
即使面對既係拜仁抑或係巴塞既防線，佢總能夠係兩位中堅或者係後防線之間搵到空位，憑著精準既預判能力黎為自己爭取到足夠既空間完成射門。

https://youtu.be/LTleeTtk3Gc(https://youtu.be/LTleeTtk3Gc)
但可能因為高度比較輸蝕既關係，只有1米73既阿古路同1米88既哥斯達黎比，會小好多既頭槌攻門。
以射門技術黎講，兩位都可以話係當今球壇數一數二既冷靜射手，分別就在於哥斯達通常接應隊友傳球之後就能夠直接攻門，但阿古路就仍然要憑自己既努力去撕開對方最後既防線。

而係場外場內，阿古路亦冇哥斯達咁多既負面新聞。所以普遍係英國黎講，阿古路遠比哥斯達要受歡迎得多喇。
後話：其實足球一開始既時候係一種紳士既活動黎，儘管發展到今時今日係一種既商業活動、係一種可以改變一個貧困兒童一家既希望，但其實作為一個球員，對對方或者足球既每一個持分者都應該要有基本尊重。

即使球場如戰場，球員都帶著拼勁同熱誠去迎戰每一場既比賽，你地可以話木仔好主觀，不過如果一個球品同人品唔好既球員，我就真係冇辦法同佢一齊踢波喇。

始終對於我黎講，足球唔係一種競技咁簡單。

今日就講到黎呢到喇，有題目想睇既大家記得黎pm我地喇！
如需轉載，請列明出處。
本文亦刊於 這裡https://footballdreamforever.wordpress.com