冷球迷入旺角大球場有感

唔係足球咁簡單 於 19/01/2016 發表 收藏文章
由中國方面富有爭議性既海報,到harsh tag #香港隊勁揪,香港人又經歷左一次身份認同既洗禮。毫無疑問既係,呢段時間入旺角場睇香港隊既人數真係多左好多。筆者去過睇幾場比賽感受下場入面既氣氛,同時同係現場睇睇香港隊既踢法。

至於點解稱自己做冷球迷呢,就因為本人唔會係球場入面敲鑼敲鼓叫口號,不過並唔代表我就唔支持香港隊既,雖然係咁,今次都想藉呢個機會同大家分析下入場球迷既分別係邊到。

一、狂熱球迷

第一種既球迷就係大家會係電視到見到揮旗唱歌叫口號既球迷喇。每次比賽佢地都會準備好一切既物資同裝備,為支持既球隊好好打氣。佢地熟悉球隊既會歌同口號,會有人帶領係咩時候叫尐咩口號、打咩拍子咁樣。佢地好希望可以帶動到全場既觀眾一齊喝彩,為球隊打氣。

呢尐既狂熱球迷係外國真係好常見架,咩魯營呀奧脫福呀等等就充斥住呢類既球迷。至於香港呢,入場球迷黎講真係咁熱衷既都只係佔小數,更多既係默默觀賞球賽既人。

二、足球愛好者

第二類既人呢就係本身好鐘意足球,但就冇特別鐘意邊一隊咁樣。呢類既球迷入場可能係為左睇場波雙方既佈陣、特定球員既踢法。始終睇電視轉播同係現場睇波既感受有好大分別,有時候係現場可以得到唔小既啟發,對呢班足球愛好者黎講係一件賞心樂事黎。

不過既然佢地只係黎睇場波,又點會同狂熱支持者一樣高叫口號呢?又或者本地球會既球迷數量唔多,所以好多時入場睇波既呢類愛好者佔既百分比都唔小,某程度上都導致左往往高叫口號既只係球場入面既一小撮人,場面冷清得可憐。

第三、趁熱鬧者

老老實實,香港隊既比賽其實真係好多只係黎趁熱鬧既市民。可能係受到媒體既渲染或者係家庭樂既活動之一,所以入到場既佢地就係為左感受球賽既氣氛,就好似係狂熱球迷既歌聲同士氣等等。而佢地有一部分會比呢班支持者調動到心裡面果團火而一齊高叫口號,但入面大部分都只係保持一貫冷漠既作風。

係一場比賽入面三種球迷佔既百分比差唔多,係世界各地黎講其實真係極之小見。於是就會睇到以下既各種衝突發生。「係咪黎睇波架,靜到圖書館咁既」「前面呢班人係咪傻左呀,支旗阻Q住哂呀」「都唔知係到high乜」等等。
無論如何,呢個香港既足球都需要香港人既支持先可以繼續發展落去既,筆者一直都好期待香港球壇會有突破點既出現令香港波越黎越多人鐘意既。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Charles Suen
    Charles Suen 於 20/01/2016 評論 NO. 1

    我係2,由細踢波踢到大。由最早捧南華,變到依家唔特別支持邊隊。

  • Chin Wai Lai
    Chin Wai Lai 於 20/01/2016 評論 NO. 2

    香港球迷就需要外國球迷個種熱情,足球就係一種有熱情嘅運動,無論係球員或球迷

  • Kenneth Lai
    Kenneth Lai 於 20/01/2016 評論 NO. 3

    外國球迷好多由細到老
    都會支持自己城市嘅球隊
    香港人太多突然球迷
    因為同仇敵愾先企出嚟
    好難一時三刻同外國比較
    不過多啲球迷入場支持香港足球
    係好事起碼班球員都落力啲踢

  • lionel messi 10
    lionel messi 10 於 20/01/2016 評論 NO. 4

    東方,i am 1

快捷鍵:←
快捷鍵:→