水晶宮爆冷嬴車路士,點評雙方球員表現

足球基地 於 15/10/2017 發表 收藏文章
係第8輪英超,榜尾嘅水晶宮主場出擊對上屆冠軍車路士,呢場倫敦打比竟然出現爆冷比數。水晶宮最後以2比1,嬴車路士。在此希望點評雙方球員表現。

水晶宮
沙夏:
沙夏係英超開鑼對哈特斯菲爾德時傷出,直到今場復出,並立刻交出好表現。水晶宮嘅4-4-2陣式非常適合沙夏,可以充分利用沙夏嘅速度及盤扭技術,有6次成功過人,更斬獲一個入球。當然要讚一讚沙高一球精準直線,使沙夏可以從艾斯比利古達同沙柏哥斯達身後衝刺,並射入高圖爾斯十指關。如果沙夏持續有好表現,相信可以協助水晶宮走出困境。

沙高
沙高今場回勇,於後防線指揮隊友企位,更成功牽制車路士嘅攻擊力。今場有3個攔截及2個截球紀錄,沙高令一個亮點係,佢今場策動水晶宮嘅攻勢並成功傳球,亦走到上前助攻沙夏,雖然沙高可以上前可能係基於車路士嘅中場防守力不足,但最少今場佢嘅表現令人滿意。

卡比耶
卡比耶今場為球隊作出具大貢獻,激活前場進攻力之外,並加強球隊防守力。今場佢主要防守夏薩特,使夏薩特無法盤扭或接球,進攻方面就係球隊中作串連角色,不時上前到禁區幫手,更造就第一個入球。值得一讚係佢今場傳球成攻率為92%,絕對係球隊中嘅重要人物。

車路士
艾斯派利古達
呢位西班牙人又閘位到翼衛同今季轉打中堅,整體都表現正常,但今場表現簡直係災難性。車路士失嘅兩球,艾斯派利古特絕對係責無旁貸,先講第一球。當唐辛從右路傳中給卡比耶,艾斯派利古達想幫忙大衛雷斯,豈知愈幫愈忙,擋走大衛雷斯嘅解圍,並彈入龍門。第二球就稍為放鬆,走漏沙夏使沙夏有機可乘並入球。總言之今場表現奇差,專注力非常低。

巴舒亞伊
如果巴舒亞伊係社交媒體上嘅活躍程度可以運用到場上的話,車路士就不必踢得咁辛苦。明顯地,巴舒亞伊係莫拉達嘅不二之選(以現有陣容來說),但確實水平有距離。佢今場除了嬴得3次高空波之外,再無其實表現好講。今場佢得到了「三零」,0射門,0盤扭同0創造機會。如果巴舒亞伊再交出此級數嘅表現,車路士嘅進攻係莫拉達回歸前,必定攻力大減。

巴卡約高
巴卡約高今場係車路士整總中,表現算係好嘅一位。今場伙拍法比加斯,有唔少新火花出現,有巴卡約高,法比加斯可以更自由地策動攻勢,而巴卡約高係中場嘅覆蓋泛圍廣,作出不少走動同防守水晶宮嘅球員。更為身高優勢為球隊入球追和,可惜隊友「唔爭氣」,走漏沙夏並入球。但略嫌狀態未足,可以做得更好。

總結

干地必須要好好計劃一下,當夏薩特被釘死,及莫拉達缺陣時嘅對策,希望可以好好善用車路士非常實用嘅中場球員,並盡快令球員競賽狀態上升。而水晶宮方面,今場勝仗並不值得一提,因為前路尚有好多關未過,其實今場水晶宮並非踢得特別好,只係車路士踢得其差,希望今場嘅勝利為水晶宮打下一支「強心針」


Source: Squawka.com, whoscored.com

留言


請按此登錄後留言。未成為會員? 立即註冊
    快捷鍵:←
    快捷鍵:→