對於克羅地亞的小感想 (非分析)

足球基地 於 16/07/2018 發表 收藏文章
克羅地亞於今屆世界盃奪得亞軍,對克羅地亞甚至世界是歷史性一刻。而小弟我早於世界盃前已經預測克羅地亞為「超級黑馬」,為支持克羅地亞,我買下人生第一件國家隊球衣。
講番今次世界盃對克羅地亞嘅感想。小弟我今年係世界盃前已經預計法國將會得到冠軍,但亞軍球隊就勢估唔到係我支持嘅球隊-克羅地亞。進入決賽週時,心裡都本著「踢得一場得一場」,完全無幻想過會得到世界盃等等異想天開嘅事。但係四強對戰英格蘭時,似乎萌生克羅地亞有機會嬴得世界盃嘅念頭,而球隊又最後可以殺入決賽。

克羅地亞係每一場比賽都表現出非常強嘅鬥心,努力不懈嘅壓迫及衝刺,永不放棄嘅跑動,以自身嘅魄力令對手恐懼,正正係一隊冠軍球隊應該表現出嘅根本條件,相信今屆世界盃都難以找到其他球隊有如此團結及鬥志。係淘汰賽階段,每一場都踢足120分鐘,當中有兩場更以12碼勝出,其實係對英格蘭嘅時候,都見到各個克羅地亞球員體力見底,但依然搏盡到最後一刻,只求勝利並創造歷史一刻,此態度實屬令人敬佩及尊重。到最後佢地做到了,真的進入了決賽。
回歸現實,比賽始終殘酷,必有輸嬴。不過克羅地亞都依然無懼挑戰,希望達成不可能的任務。畢竟係前三場賽事已經踢足120分鐘,球員嘅體力係臨半場前已經幾乎消耗得所剩無幾。最後下半場就兵敗如山倒,任人魚肉,輸一球可以追,但輸兩球就....,但克羅地亞球員並無放棄,繼續拿出拼勁,突然另我想到一句TVB劇集金句,「咩都可以輸,但信心唔可以輸!」球惜都未能改變戰局,當然最後由法國贏出比賽捧走大力神盃,比賽並無任何爆冷嘅成份,因為克羅地亞能夠站於決賽舞台上,已經係「爆大冷」。
克羅地亞今次嘅世界盃表現令世界刮目相看,更團結了克羅地亞人,足總亦都「訓身」支持,放出小部份球票讓球迷進場打氣,更送出包機送球迷到俄羅斯。球隊嘅球員來自五湖四海,正如香港隊一樣,一部份嘅球員並不是克羅地亞土生土長或國藉相異,但都出盡「奶力」踢好每一場比賽。再加上克羅地亞總統都穿上國家隊球衣於觀眾席上支持球隊,作為香港人嘅我,實在非常之妒忌。
最後,恭喜法國相隔20年後,再一次奪得世界盃。有人會話「世人只會記住冠軍」,但我相信今次嘅克羅地亞將會係一隊令世人記住嘅亞軍,我覺得克羅地亞今次並無輸掉任何東西,反而收穫更多。比賽故之然重要,但享受過程亦都係球賽中不可缺少嘅一部份,相信無論克羅地亞支持者或其他國家隊嘅球迷都非常享受今屆世界盃,亦相信克羅地亞人可以自豪地說自己國家得到世界盃亞軍。



以上只屬小弟嘅小小感想,請多多包涵。

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • kinfung
    kinfung 於 16/07/2018 評論 NO. 1

    on9,世界盃前預計到克羅地亞系黑馬,又話預計到法國奪冠,筆者乜都預到,可吾可以預計埋下季英超同日職邊隊拎冠軍呀,幫下手呀

  • ryankwok
    ryankwok 於 16/07/2018 評論 NO. 2

    kingfung,筆者係八爪魚保羅托世又話你知咩

快捷鍵:←
快捷鍵:→