利物浦三球帶走雙紅會 坦哈格賽後記者會劍指季尾捧盃

利物浦三球帶走雙紅會 坦哈格賽後記者會劍指季尾捧盃

英超星期日尾場賽事雙紅會，曼聯主場大戰利物浦，荷蘭光頭大鬥法，整場賽事由利物浦攻入三球擊敗曼聯，其中沙拿交出一球兩助攻、迪亞斯個人梅開二度，而曼聯一對正選中場就輪流自爆派膠導致失球。
賽事主要喺上半場最為精彩，因為下半場利物浦都收油，曼聯亦無力反撲，但賽後記者會坦哈格又做焦點。面對再一次輸比紅軍，曼聯領隊坦哈格表示：「我並唔係哈利波特，有三個球員都係新加盟，烏加迪(Manuel Ugarte)需要訓練操fit體能，然後先可以帶佢融入球隊，呢段時間將會係幾個星期或者一個月。」

以上嘅說話都係合情合理，不過坦哈格繼續講：「我哋有犯下錯誤，而對手亦好冷靜處理最後一腳。三個失球都係因為自己個人犯錯，或者最後你可以討論我哋嘅雙防中去咗邊，但我誠實地覺得利物浦踢得好，譬如佢哋點樣去應對turn Over同埋門一腳，只不過我見到Expected Goal，其實唔算高。」
「利物浦值得今場嘅勝利，我哋要謙虛，並且接受從而為未來進步。我見到失球上Expected Goal嘅數據，數據上我哋冇好似上季咁多失球，我唔認為我哋同上季一樣，因為我睇唔到，我認為呢個只係賽事變得開放，而我哋承受風險，我認為我見到一啲好嘅地方，但我唔想喺輸咗三比零之後討論呢啲嘢。」

「今場係今個賽季嘅第三場比賽，我要為此解釋好多次，我哋喺度建立新嘅團隊，我哋會向好方面發展，直到季尾我相當有信心我哋有好大機會能夠捧起另一個獎盃。」

除咗以上言論，面對記者們嘅提問，其中一段更加誇張，當時坦克格邀請記者解釋曼聯邊一部份經常有犯錯，而後來記者講到中場有唔少嘅失誤、後場Build up被截斷、係主場放棄無數機會等等問題，但坦克格表示：「我唔認為喎，否則我哋就唔會捧起獎杯，並且擊敗強大嘅對手，所以好抱歉，我有另一個觀點，我哋係曼城之後贏得最多獎杯嘅英超球隊。」
如果睇到呢度，不妨follow我地嘅instagram同Youtube睇到更多唔同嘅足球資訊！
IG : Footballarena_hk
Facebook: 足球港場
Youtube: 足球港場 - Chung