波圖歐聯絕殺阿仙奴！阿仙奴又做歐聯十六郎？ 精選

波圖歐聯絕殺阿仙奴！阿仙奴又做歐聯十六郎？
歐聯十六強賽事，阿仙奴作客征戰波圖火龍球場，阿仙奴方面今日排出4-3-3陣式，基於辛真高、加比爾捷西斯仍然受傷，正前鋒繼續用上杜沙特(Leandro Trossard)，左閘用上基維柯(Jakub Kiwior)，其餘位置人員上冇變動。至於另一邊嘅波圖，今日擺出4-2-3-1陣式，由伊雲尼臣(Evanilson)出任正前鋒，取代受傷嘅伊朗前鋒泰列美(Mehdi Taremi)，而左翼就係歐聯賽事表現神勇士嘅加利奴(Wenderson Galeno)。

上半場阿仙奴雖然控有7成控球率，但踢出嘅表現，並不如英超賽場上穿花蝴蝶嘅走位配合，反而表現上較為緊張、綁手綁腳。防守時會係前場對位人盯人逼搶，而進攻時右閘賓韋特(Ben White)會內收協助組織，形成3-2-4-1進攻陣式，左中場夏域斯就會上前協助進攻，但今日右翼薩卡受到嚴密看管，左翼馬天尼利係上半場雖然有一兩次沿着邊路突破，但較多時間傳球控球都較為失準，前鋒嘅杜沙特就更少機會掂波，因此阿仙奴係上半場進攻推進做得並唔流暢。
相反波圖主要會縮後集中防守塞位，4-3-3防守陣式收窄線與線之間嘅距離，塞位再反搶球權打反擊，其中21分鐘波圖球員沿右路落底全中，阿仙奴中堅加比爾解圍之下皮球彈起，左翼加利奴係十二碼點從後移上楔位走去前柱，起腳先中楣角，反彈下係門前補射就出界，所以阿仙奴係上半場可以講係避過一劫。

下半場阿仙奴係中場更多轉向去拉散空間，而波圖防守依舊能夠瓦解兵工廠進攻戰術，及後76分鐘佐真奴入替杜沙特，夏域斯移向中鋒位置，但隨着時間過去，阿仙奴逼搶強度同進攻侵略性逐漸下降，最尾嘅補時階段更打算守和就算，偏偏喺94分鐘波圖一次進攻，波圖左翼加利奴係禁區外左路起腳世界波入網絕殺，結果波圖主場以一比零絕殺阿仙奴拿下首回合，次回合將會移師到酋長球場上演。
主隊波圖嘅防守部署成功地令阿仙奴今日中目標嘅射門都冇，左閘嘅雲度(Wendell)亦成功地守住薩卡，中場嘅尼高干沙利斯(Nico González)都有展現推過半場同遠射嘅能力，而最後值得一讚嘅當然係左翼加利奴，除咗尾段嘅絕殺，上半場中楣角嘅施射都反映佢嘅威脅程度，目前歐聯賽事交出5球3助攻，次回合值得多加留意。

客隊方面阿仙奴上半場進攻塞車、表現緊張，本以為半場過後會有所調動，但下半場嘅取替依舊係保守同守和就好，結果臨天光瀨尿被絕殺，結果地反映阿迪達其實可以進取多少少，譬如喺尾段換入進攻球員，包括尼基迪亞同列斯尼爾遜試一試，畢竟返到主場都唔一定能夠解決對手。如今波圖一球在手，次回合必定會更專注防守縮後，阿仙奴能否打破鐵桶陣將會決定佢哋能否擺脫「歐聯16郎」嘅暱稱。

如果睇到呢度，不妨follow我地嘅instagram同Youtube睇到更多唔同嘅足球資訊！IG : Footballarena_hk
Facebook: 足球港場
Youtube: 足球港場 - Chung