護級大戰盧頓尾段逼和般尼 領隊甘賓尼怒斥球證判決是笑話

護級大戰盧頓尾段逼和般尼 領隊甘賓尼怒斥球證判決是笑話

英超護級大戰，般尼主場對盧頓，般尼上一場賽事係足總盃被熱刺淘汰，今日4-4-2陣式兩翼出返古蒙臣(Johann Berg Gudmundsson)同法國小將奧度拔(Wilson Odobert)，左閘方面因查理泰萊(Charlie Taylor)受傷用上身型瘦削嘅達希爾(Ameen Al Dakhil)。另一邊嘅盧頓今日繼續3-4-2-1陣式，基於右翼衛卡普利(Issa Kaboré)征戰非洲盃同攻中布朗(Jacob Brown)受傷，因此右翼衛用上奧比尼(Chiedozie Ogbene)同攻擊中場用上卡拉克(Jordan Clark)，而中場繼續由巴克利領軍。
上半場盧頓前場逼搶相當有幹勁，侵略性高，一度令般尼難以搓上去，9分鐘巴克利禁區外遠射亦被門將撲出，因此盧頓上半場威脅甚大，特別係進攻時中鋒艾迪巴約頂到最前，攻擊中場分別係兩邊插入half space同翼衛夾擊對方閘位，其中上半場盧頓主要利用右路作突破口，一係嘗試通過般尼左翼奧杜拔不善回防嘅特點嘗試製造2打1嘅局面，二係欺負對方左閘達希爾瘦削嘅身型，不過盧頓往往只係畸角位或落底傳中，般尼嘅球員又相當善頂，因此般尼縮後就解決一次又一次嘅危機。相反係36分鐘般尼反擊，奧杜拔對左路落底傳中，對住前曼聯中堅文治(Teden Mengi)用速度一加速就過，前鋒安道尼(Zeki Amdouni)禁區十二碼點接應撞入領先1比0。
下半場一球在手嘅般尼放棄控球等機會打反擊，盧頓球員大舉進攻，相反般尼打算守到尾，係74分鐘換多一名守衛踢5-4-1陣式，本以為賽事會以1比0結束，但92分鐘左翼衛達堤(Alfie Doughty)左路傳中，摩利斯(Carlton Morris)十二碼升起頭鎚頂入追平一比一，雖然前鋒艾迪巴若有阻礙門將查福特出迎嘅嫌疑，但係VAR判斷入球有效，最終盧頓最尾一刻逼和般尼1比1，兩敗俱傷之下繼續係護級區掙扎。

般尼方面依舊左翼係佢地嘅唯一殺著，不論速度同盤扭技術都能製造威脅，只可惜最尾嘅入球導致失分相當冤枉，整場game plan明確，賽後領隊甘賓尼直言判決猶如笑話，質問到底要發生幾多次錯判事件。另一邊盧頓方面老將唐斯拼博嘅精神依舊值得欣賞，而右翼衛嘅奧比尼雖然創造4次機會但個人獨食嘅時機錯晒，若果唔獨食而交波或許盧頓係上半場早已領先，但考慮到佢係攻擊中場/右翼出身就難以批評更多。然而後防中堅明治顯然級數不足以立足英超，對於球隊能否護級依舊唔睇好。
如果睇到呢度，不妨follow我地嘅instagram睇到更多唔同嘅足球資訊！
IG : Footballarena_hk
Facebook: 足球港場