皇馬唯一健康中堅魯迪加頭鎚致勝 馬略卡守足全場惜敗

皇馬唯一健康中堅魯迪加頭鎚致勝 馬略卡守足全場惜敗

西甲聖誕假期後首日賽事，皇家馬德里對馬洛卡，榜首嘅皇馬連續12場聯賽不敗，今日4-4-2陣式後防線只有一位健康嘅中堅魯迪加(Antonio Rüdiger)，因此需要曹亞文尼(Aurélien Tchouaméni)串現中堅，而排面上由傷癒復出嘅雲尼修斯同洛迪高擔任雙前鋒。馬略卡方面5-4-1陣式擺明車馬打防守反擊，具威脅嘅包括加拿大國腳前鋒拉連(Cyle Larin)同左翼丹尼爾洛迪古斯(Daniel Rodriguez)。
整個上半場皇馬都係壓住馬略卡進攻，馬略卡5-4-1陣式兩層防守相當緊密，對住皇馬步步進逼會且戰且退，令皇馬係進攻上並無太多甜頭，畢竟對方已經完成佈防。皇馬進攻上全軍壓過半場，兩閘拉邊上到三閘線如同翼鋒，摩迪同比寧咸就會內收到中場運送或作後上插入，而一對前鋒時而拉邊，時而企返係禁區，皇馬中前場球員流動性相當高，所以佢地係非常難應付。

20分鐘雲尼修斯中路Half Space入楔，摩迪禁區頂腳面片入禁區，雲尼修斯接應後起腳遠柱僅僅一個波位射斜。此後上半場中龍門嘅起腳都被門將拉積高域(Predrag Rajkovic)撲出。相反馬略卡都有一絲機會，41分鐘左翼丹尼爾洛迪古斯左路搵到機會落底，半轉身chip去尾柱，右翼山齊士(Antonio Sánchez)頭鎚一頂卻中楣，馬略卡錯失黃金機會，上半場兩隊踢成0比0。
換邊後馬略卡換上正宗左翼衛嘅拉圖(Toni Lato)，佢地亦趁早段有氣力嘅時候作出前場逼搶，呢一段時間令皇馬無所適從，甚至係54分鐘中場球員Samu遠射冷箭射中柱彈出，因此馬略卡經過半場調動後較為積極。

60分鐘後皇馬相繼換入巴謙迪亞斯(Brahim Diaz)同前鋒祖斯路(Joselu)，轉陣打4-2-3-1陣式，而有返一個正中鋒係禁區就影響到對方三中堅嘅盯防目標，69分鐘洛迪高左路一射被撲，巴謙迪亞斯近門頭鎚撞內柱彈出，雖然未有入波但已經相當接近。去到79分鐘皇馬一次角球攻勢，摩迪開出再由中堅魯迪加頭槌頂入，終於打破大門，結果皇馬憑着呢一個入球主場1比0擊敗馬略卡，全取3分繼續穩住榜首位置。

皇馬方面上半場流動性踢法雖然做到8次射門但真正威脅不大，同時進攻亦傾側於右路，而半場後換入祖斯路同抽起雲尼修斯令前場組織分工更清晰，因為今日一對正選前鋒工作同位置有啲重疊未有擦出火花。馬略卡方面態度上明顯就係要執行防守反擊戰術，上半場戰術部署成功守和，下半場初段壓前亦給予驚喜，當中整場有兩次攻門中柱同被對手以角球攻勢破門實屬冇運，因此球隊只能寄望射手穆歷基(Vedat Muriqi)盡快復出，以助球隊脫離護級漩渦。
如果睇到呢度，不妨follow我地嘅instagram睇到更多唔同嘅足球資訊！
IG : Footballarena_hk
Facebook: 足球港場