利物浦5比1大破西咸晉級四強 韋斯咸後備狀態差兵敗如山倒 精選

利物浦5比1大破西咸晉級四強 韋斯咸後備狀態差兵敗如山倒

英格蘭聯賽盃八強賽事，利物浦主場對韋斯咸，主隊方面上一場圍攻曼聯但踢成0比0，今日4-3-3陣式有唔少輪換，包括起用青訓產品居迪斯鍾斯(Curtis Jones)、艾利諾(Harvey Elliot)同中堅昆沙(Jarell Quansah)。客隊方面上一場3比0大破狼隊，陣中古度斯(Mohammed Kudus)梅開二度、柏基達(Lucas Paquetá)助攻帽子戲法，而今日4-2-3-1陣式盡出副選，後防賓莊遜、中堅奧邦拿同馬夫路邦奴斯同前場嘅科奴斯、賓華馬都係平時較少出場機會，因此出場陣容相比韋斯咸處於下風。
上半場兩隊基本形成攻防格局，利物浦擁有66%控球率同11次起腳，相反韋斯咸毫起腳機會，因為紅軍經常搶返控球權，再係前半場圍攻。今日代替沙拿出任右翼嘅艾利諾狀態大勇，20分鐘前三次起腳都幾有威脅，而整隊利物浦不斷係禁區外施射，直到28分鐘蘇保斯禮擺脫頹勢，禁區外右路左腳勁射入網，為球隊領先1比0。韋斯咸苦苦支撐下仍然被攻破大門，往後偶有反擊都只有古度斯有啲期望，但上半場兩次轉邊都係嚴重偏離目標，因此上半場兩隊分野甚大。

換邊後56分鐘鍾斯直線走過突破中堅防線，左路底線前起腳，射破龍門大細並且贏到2比0。及後沙拿、阿諾同中堅干拿迪落場分擔體力消耗，呢三位主力上陣後令主隊進攻更立體多變更具威脅。去到71分鐘加普(Cody Gakpo)左路禁區外推進，對方中堅且戰且退，結果一推再起腳射近柱入網，將比數拉開至3比0。
然而77分鐘韋斯咸左閘賓莊遜大腳比上前場，查洛保雲加速走過中堅昆沙，去到禁區左腳一cup一推右腳施射入網，為韋斯咸追返一球。利物浦82分鐘反擊，沙拿單人推過半場單刀射入。最後84分鐘鍾斯自己單人先直線推進，5人包夾下推去右邊起腳入網，韋斯咸兵敗如山倒，利物浦以5比1大炒西咸晉級聯賽盃四強。

利物浦方面今場平衡後備同正選嘅安排做得好好，艾利諾、鍾斯等球員都相當「餓波」有鬥心，對於主隊係一場輕鬆嘅賽事，一場優勝劣敗嘅賽事。至於韋斯咸後備球員狀態奇差，整場佈陣打防守反擊但只係一次偶然地做到，輸第四球單刀士氣崩潰，第五球直頭比對手隨意推進起腳，固然理解盃賽係給予後備球員上陣嘅契機，但球員狀態差卻係今場出局嘅主因，因此希望韋斯咸其後唔會受呢場大敗影響士氣。
如果睇到呢度，不妨follow我地嘅instagram睇到更多唔同嘅足球資訊！
IG : Footballarena_hk
Facebook: 足球港場