英超賽季預測 - 第十七 & 十八位

足球港場 於 27/07/2022 發表 收藏文章
22/23英超賽季預測🏴󠁧󠁢󠁥󠁮󠁧󠁿🦁
loading

第1️⃣7️⃣位 列斯聯⚡️
上季以第17位護級成功嘅列斯聯,今夏賣走兩大主力加雲菲臘斯同拉芬拿,將賺取嘅轉會費投資落5位新主力球員,包括1200萬歐元從拜仁慕尼黑購入防中馬克洛卡(Marc Roca)、2000萬歐元從RB萊比錫購入中場泰拿阿當斯(Tyler Adams)、支付3300萬歐元同1300萬歐元從薩爾斯堡紅牛引入攻中班頓艾朗臣(Brenden Aaronson)同右閘基斯甸臣(Rasmus Kristensen),最後就係2500萬歐元從飛燕諾帶來左翼史尼斯泰拉(Luis Sinisterra),目前為止花費一億歐元有多但仍然收資平衡😳
由謝斯馬殊領軍嘅列斯聯確實有補強嘅需要,應該講係補充陣容上嘅缺陷,因為上季列斯聯受傷患困擾,前中後一係由其他位置嘅球員頂上,一係由U23頂住,例如謝赫特、森馬維同Sam Greenwood,雖然球隊能夠勉強護級,但大改革在所難免,而出身自紅牛集團嘅馬殊就將列斯改造成美國x紅牛版本,引入嘅都係年輕有潛力嘅球員,不過問題係5位引援都係非英超聯賽球員,阿當斯同馬克洛卡係德甲上陣機會少,同時薩爾斯堡紅牛同英超嘅水平相差甚遠,仲有冒起嘅左翼史尼斯泰拉來自荷甲飛燕諾,數據一絕但級數不一,因此呢班引援都會幫到手但未必個個能夠適應英超,所以列斯聯來季繼續要為護級而戰🥵
第1️⃣8️⃣位 愛華頓🔵
上季第37輪聯賽護級成功嘅愛華頓,我地推測拖肥有機會以第18位降班,到底點解上季能夠以第16位衝線但今季就有降班危機呢🥶
今個夏天球隊出售李察利臣到熱刺,但雙中鋒少左一個並無補強,反而只有免簽般尼中堅達哥夫斯基同借用前狼隊左閘嘅維納格(Ruben Vinagre)。達哥夫斯基嘅來投能夠增加中堅深度,因為上季米高堅尼防守經常出錯,另一正選中堅耶利米拿受傷患困擾上季只出13場聯賽,令到中堅位置就要輪流用賀基治同賓葛菲,效果一般,所以有達哥呢位擁有豐富護級經驗嘅中堅就非常有用。除左中堅,左閘方面賣走迪尼後就要依賴米哥蘭高,上季嘅傳球決定係相當恐怖,因此愛華頓係有限金錢下借用史砵亭嘅左翼衛維納格,呢位23歲左腳翼衛過往效力狼隊有英超經驗,但外借到史砵亭都係打後備,作為翼衛有唔錯嘅推進能力,但係攻強於守,是否適合護級嘅愛華頓就有待觀察,或者佢符合林柏特心中想打嘅進攻足球🤧
愛華頓資金有限令到買人方面唔算積極,雖然賣走左李察利臣,但來季嘅進攻好手仲有今季穿起10號球衣嘅安東尼哥頓同卡華利雲,只要來季卡華利雲、唐辛、湯戴維斯同耶利米拿能夠健康穩定地上陣,愛華頓嘅陣容都勉強能夠喺下半版競爭,然而最大嘅變數或者係林伯同阿里,最近季前熱身賽愛華頓先後輸比阿仙奴同美職聯嘅明尼蘇達聯,而且係被美職聯大炒四球,當然熱身賽未能作準,比賽亦志在幫助球員恢復狀態,去到上場對英冠黑池先贏下第一場熱身賽,其中5-4-1陣式嘅中鋒卡華利雲受到看管,要靠左右兩翼同迪利阿里發功,問題係阿里能否擔大旗真係難以想像,此外林伯會否重推「進攻足球」又係難以估計,所以林柏特能否係來季保住「名宿光環」領導愛華頓護級成功就唔太樂觀,因此在此大膽推測愛華頓會係來季降班🥸
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

留言


請按此登錄後留言。未成為會員? 立即註冊
    快捷鍵:←
    快捷鍵:→