英超賽季總結 - 第4位 熱刺

足球港場 於 02/07/2022 發表 收藏文章
《英超賽季總結》
第4️⃣位 熱刺🔱
loading

「踩唔死我~踩唔死我🎶」引用阮民安改版韓國G Dragon《Crayon》嘅歌曲作今日嘅引旨,點解要用下三爛嘅歌曲講攞到前四嘅熱刺呢,因為講嘅並不是熱刺,而係熱刺主席利維,2021年穿插兩季嘅手段都係下三爛嘅行為,因此攞到前四只係熱刺領隊同球員嘅功勞🥲
現實:第4位 預測:第7位(⬆️3位)
開季前我地預測熱刺會保持第7位衝線,因為熱刺將要參戰歐協聯三線作戰,同時夏天嘅收購相當單調,加上前季嘅鬧劇,令人對熱刺嘅前景毫無信心👎🏼
還記得當初聘請冠軍教頭摩連奴係為左贏冠軍嘛?結果臨到聯賽盃決賽卻辭退摩連奴,咁其實利維營運呢隊熱刺係想贏冠軍定係純粹霸住英超一席位?炒完人又無後備方案反而係起用懷恩美臣作暫代領隊,咁係無後備方案嘅時候就炒人同放棄賽季無分別🥱仲有「反摩大隊長」巴爾大大聲講進攻足球,真係得啖笑,更可笑嘅係熱刺由5月起開始搵新領隊處處碰壁,甚麼方辛卡、普捷天奴、費歷克、加度素、盧柏迪古,甚至干地都一一拒絕熱刺嘅邀請,干地曾經直言睇唔到呢幾年奪冠嘅可能,直到7月熱刺先至搵到前狼隊領隊 - 紐奴🇵🇹
揀無可揀之下又要貪平就搵到紐奴,對於利維嘅所作所為除左歐洲球壇有目共睹繼而令選帥有困難外,當家球星哈利簡尼亦心灰意冷,重點係利維並無履行同簡尼嘅君子協定,曼城出價大約1.5億鎊都拒絕出售簡尼,一度令球員罷操抗議,係到後期簡尼心態軟化先歸隊🥲講返夏天引援其實唔算完全對症下藥,例如引入嘅拜恩基爾取代拉美拿但仍需磨練,艾馬臣質素有限,接近1700萬歐元買一位18歲中場Pape Matar Sarr但名不見經傳兼且繼續外借磨練,仲有借入後備門將哥連尼同中堅羅美路,因此講咁多只有羅美路係直接幫到手,其他都係實力有限或對未來嘅投資,但呢到已經洗左接近7000萬歐元轉會費🥵
去到開季新人事新作風,紐奴領軍頭三場三連勝但三場都係贏1比0,但係簡尼回歸後並無全情投入,安排孫興慜打右翼更加廢左一半武功,然而球隊攻不銳守不穩,歐協聯小組賽3戰1勝1和1負,無說服力嘅表現加上聯賽輸比正值混亂局面嘅曼聯,結果紐奴領軍4個月就被炒魷,過往帶領狼隊升班所建立嘅名聲一鋪清袋,所以話有時候選擇比實力更重要🥶
選擇比實力更重要,那麼選擇到一個有實力嘅領隊就係今季熱刺扭轉乾坤嘅關鍵,曾經直斥熱刺嘅干地不知為何願意執教熱刺,或者係有錢洗得鬼推磨,但干地係11月領軍立即拯救球隊,首先為左加強防守直接轉成佢最愛嘅三中堅陣式,第一場歐協聯旗開得勝後,聯賽首戰愛華頓係賽和0比0,花費一段時間摸索球員嘅能力,加上歐協聯被判出局,聯賽方面就開展不敗旅程,3連勝後對戰輪換陣容嘅利物浦幾乎以防反戰術擊敗對手,聯賽8場不敗由中游回升至前六位置,其間仲有3比2反勝絕殺李斯特城,直到對戰車路士不敗紀錄先至中斷,但當時孫仔同羅美路都因傷缺陣~
時間終於嚟到冬季轉會窗,一個屬於干地增兵嘅機會,而干地馬上透過佢同總監柏利迪斯係意甲嘅網絡帶來中場賓坦古亞替代因傷收咧嘅史基比,仲有古路錫夫斯基充當第三位箭頭🔱
不過事情都唔係一帆風順,新兵加盟需要時間適應,加上迪亞、羅美路先後復出,施斯隆同杜靴迪得到重用取代艾馬臣同列古朗,陣容嘅變動令球隊係2月中至3月中嘅戰績出現贏輸贏輸嘅走勢,其後先至穩步上揚🙌🏻
最後嘅11場聯賽8勝2和1負,確立三中堅同防反戰術確實奏效,例如大勝壓前進攻嘅紐卡素同阿士東維拉,但面對縮後防守嘅球隊例如賓福特同白禮頓,熱刺進攻就會陷入啞火,不過熟練呢一套防反戰術除左令戰績穩定上升取得前四,更加令簡尼嘅進攻變得全面性,並且將孫興慜嘅速度突破把握力發揮到極致,繼而令孫仔係今季取得23球7助攻成為金靴獎得主之一,因此熱刺能夠由沉船變成飛船全賴干地嘅到來🤙🏻
提到防反戰術,簡尼回後組織,孫仔負責突破,不禁令人回想起熱刺前一任領隊摩連奴,有如此改動正正就係摩連奴係領軍時期作出嘅嘗試。另外,摩連奴同干地都係冠軍教頭,都係難以駕馭,不過明顯嘅分別可能在於輸波時係摩佬責任,但干地輸波時就係球員責任🥱不過干地確實比摩連奴更得更衣室嘅歡心,三中堅陣式嘅艾歷迪亞有回勇嘅跡象,陣中亦有佢帶來嘅意甲兵,再延伸嘅就係利維有否支持領隊嘅分別🥶因此,干地係權鬥同期望管理確實有一手,季初唔加盟因為眾人期待干地嘅來臨係奪冠,但熱刺陣容有幾多就心知肚明,所以係季中接手所期望嘅就只係奪得前四~另外係贏輸贏輸時期,贏波就大讚球隊輸波就「扭計」話辭職,或許能夠給予壓力令球隊自省踢得更好,但相信壓力係去左主席利維身上,否則利維又點會私人注資1.5億鎊比干地增軍,特別係逼到「孤寒鬼」利維泵水,因此干地絕對係有料到,仲未提到現時佢嘅火速增兵,所以即管睇下干地能否帶領熱刺打破冠軍荒🏆
今季代表作:曼城 2-3 熱刺🙌🏻
最佳收購:古路錫夫斯基 Dejan Kulusevski🇸🇪冬季救兵
最佳球員:孫興慜 Heung-Min Son🇰🇷金靴獎得主之一
最佳進步球員:孫興慜 Heung-Min Son🇰🇷23球7助攻
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

留言


請按此登錄後留言。未成為會員? 立即註冊
    快捷鍵:←
    快捷鍵:→