英超賽季總結 - 第6位 曼聯(上)

足球港場 於 28/06/2022 發表 收藏文章
《英超賽季總結》
第6️⃣位 曼聯👹(上集)
loading

曼聯嘅表現今季可以講係達致災難級嘅水平,包括係近年聯賽績分最低嘅一季,得失球「動態清零」,呢一場災難唔係天災而係人禍,球會、領隊、球員都有責任,特別係曼聯球員,先不論球員嘅表現對唔對得住自己同天價人工,但佢地對唔對得住支持佢地嘅球迷,特別係人生可能只係有能力去一次兼且遠道而來入場,仲要比成千幾蚊港紙買飛嘅各地曼聯球迷,曼聯球員背負嘅除左係眾人嘅目光,更加係球迷嘅期望同球會嘅光輝歷史,而今季展現嘅態度同表現係竟然令球迷想快啲完季,但過往有球賽睇係賞心樂事嘅事情,可見今季嘅表現有幾惡劣,或者我地引用曼聯球員現時最中意擺係口邊嘅說話「我地唔配穿上曼聯球衣」作引旨👹
現實:第6位 預測:第2位(⬇️4位)
開季前我地預測過往一季得到聯賽第二同歐霸盃亞軍嘅曼聯能夠保持第二位,因為上季嘅般奴、卡雲尼、格連活特同拉舒福特確實有亮點,加上夏天先後購入傳聞多時嘅辛祖同中堅華拉尼,除左有針對性嘅補強,仲有係韋斯咸打得生龍活虎嘅連加特回歸,「合約戰士」普巴需要交出好表現搏新合約,種種因素令人認為曼聯看似走上正軌,但一切卻係我地同曼迷嘅痴心妄想💔
8月14曼聯正式開季,英超首戰對住列斯聯上演「玫瑰打吡」,般奴帽子戲法,普巴單場四助攻,對曼聯嘅期望再升一級,因為般奴普巴之間嘅不和傳聞看似不攻自破,及後辛祖、華拉尼陸續上演地標戰,更甚嘅係國際賽期後C朗回家😳
巴塞間接迫使美斯離隊震驚全球後,巧合地「絕代雙驕」嘅另一位再向轉會市場投下一顆震撼彈,就係C朗唔去曼城加盟曼聯,由當初轉投祖記以為C朗係為左延長球員生涯,到今季以當時36歲之齡再次挑戰英超,呢個消息簡直係勾起唔少有一定波齡嘅球迷過去嘅回憶,最重要係C朗宣佈回家帖文嘅最後一句” Sir Alex, this one is for you…”,震撼程度令人會質疑自己係咪發緊夢🤯
C朗回家第一場對住紐卡素梅開二度,92分鐘曼迷寵兒連加特都開齋,整個奧脫福陷入瘋狂狀態,同時間曼迷曼聯同球員嘅期望值亦達到頂點,然而曼聯就開始一步一步地往下沉😶‍🌫️
歐聯小組第一場對住瑞士球隊年青人,C朗破門領先,雲比沙卡紅牌踢少一個令蘇B決定只守不反擊,打算保守到完場,而連加特嘅致命回傳更係「助攻對手」絕殺自己,歐聯首戰失利可見蘇斯克查嘅調動依然故我,而對於連加特,好彩佢係下一場完成絕殺韋斯咸及時救贖自己,但曼聯嘅路途逐漸崎嶇🥶
後備陣容應戰聯賽盃出局,對戰阿士東維拉被絕殺,兩場破密集嘅賽事都係失敗告終,其後歐聯對維拉利爾首循環更加係靠晒C朗拿度先能夠反勝,之後對愛華頓賽和1比1,被李斯特城以4比2擊敗,仲有之後嘅「雙紅會」同曼市打吡,我諗就無需要再仔細一一提及🥲係歐聯小組賽方面6戰3勝2和1負,C朗拿度5場入6球,基本上以佢一人之力扭轉敗局挺進歐聯淘汰賽,當然唔少得係更衣室嘅領導力,兩戰維拉利爾同阿特蘭大都係下半場先至取勝/追平,至於領軍不力嘅蘇斯克查係最後一場,恥辱地4比1大敗予屈福特後被解僱,曼聯先至幾乎結束荒誕嘅上半季🥵
蘇斯克查領軍曼聯接近3年,由第6️⃣衝上第2️⃣,仲要一度接近歐霸盃冠軍,當中係功大於過定過大於功就由球迷自行定奪,因為般奴、卡雲尼、辛祖同華拉尼都係蘇B時期簽入,格連活特亦係佢領軍下得到成長,但同時8000萬鎊購入麥佳亞、雲比沙卡、阿曼迪亞路等等失敗收購亦有一定數量,所以對於蘇B嘅功過不能只睇今季嘅失敗而下定論。然而,蘇B統領曼聯一事可見管理層嘅無能,由暫代領隊轉正,希望利用名宿光環尋回「曼聯DNA」,但其實蘇斯克查除左擔任好好先生令更衣室和諧之外,賽場上嘅調動係一直為人垢病,例如死用勝利十一人,唔識變通,買入雲迪碧克但就放入雪櫃,同時又無特別嘅戰術方針,「自由行戰術」可以頂到一時,但唔能夠帶領球隊奪冠,特別係C朗加盟後衝擊呢個「無體系」嘅體系,結果係一片罵聲之中下台❌除左係將暫代領隊轉正,季前曼聯管理層同蘇斯克查續約至2024年,令到季中炒人需要賠償一大筆金錢,而炒嘅時間又唔夠乾脆利落,早係失落歐霸盃冠軍已經係一個下台階,其後被利物浦同曼城擊潰後嘅國際賽期亦係一個時機,結果走漏干地,仲要係賽程頻密嘅時間開刀,令到曼聯差啲再衰多鑊,因此曼聯嘅管理層係上半季嘅不穩定佔有更大嘅責任。
換帥後先由卡域克出任暫代領隊,統領3場打返出應該有嘅水平,3勝2勝1和,為曼聯帶來一波新景象後,就嚟到新「暫代領隊」上任 - 逼搶大師蘭歷克🇦🇹
P.s 篇幅過長需要分開集數🙌🏻
今季代表作:曼聯 3-2 熱刺🙌🏻
最佳收購:C朗拿度 Cristiano Ronaldo🇵🇹36歲回家
最佳球員:C朗拿度 Cristiano Ronaldo🇵🇹18球3助攻+多次拯救球隊
最佳進步球員:費特 Fred🇧🇷4球4助攻
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

留言


請按此登錄後留言。未成為會員? 立即註冊
    快捷鍵:←
    快捷鍵:→