英超賽季總結 - 第11位 紐卡素

足球港場 於 19/06/2022 發表 收藏文章
《英超賽季總結》
第1️⃣1️⃣位 紐卡素🏰
loading

「抱歉,有錢是真的能為所欲為💰」呢句句子並唔係歌詞,而係出自「奸人」鄭子誠口中嘅一句台詞,但呢句說話正正就適用於暴發戶兼起死回生嘅紐卡素,仲記得根據英超歷史,過去共有四隊球隊經歷頭14輪聯賽仍未開齋,最後通通降班,但呢項紀錄相信係今季季後就要改寫,因為紐卡素係集齊「冬窗五人組」後,成績直線上升,由降班區殺到第11位,成績比起「傳統護級線」嘅40分仲要高出9分,所以有錢真的能為所欲為🥵
現實:第11位 預測:第18位(⬆️7位)
開季前我地預測紐卡素會降班收場,因為上季能夠以第12位衝線,全賴借用嘅韋洛克大爆發,上陣14場攻入8球,成功為布魯士同紐卡素吊一吊命,但實情係陣中工兵居多,哥林威爾遜經常受傷,祖連頓仍未開竅,令人感覺呢支老牌球隊會難逃一劫🥲
去到上年8月嘅時候,基於當時嘅班主艾殊利投資有限,紐卡素除左正式購入韋洛克外就無其他實際行動,結果開季就迎來厄運,聯賽8場不勝,而10月初沙特投資基金入主紐卡素後都有給予機會比布魯士,但始終人腳同領隊功力都未有改善,最終布魯士係10月中落鑊,當時紐卡素已經係降班區掙扎😢
除左係球員質素問題,其實當時傷患都有影響,正選門將杜巴夫卡一早受傷,年輕門將活文(Freddie Woodman)上陣4場後又受傷,其後由後備門將達路(Karl Darlow)頂上。單係門將位置已經有不停變動,而中場嘅莊祖舒維(Jonjo Shelvey)同前鋒哥林威爾遜同期亦受傷患困擾,結果令布魯士未能排出最好嘅陣容應戰~
啟動換帥程序嘅紐卡素去到11月27號先真正由少帥艾迪賀維領軍第一場,當時聯賽累計12場不勝,名次跌到落榜尾,而艾迪賀維亦唔係一上任就幫到手,頭7場聯賽只有一勝,畢竟人腳上仍然無變,但其實陣容、戰術已經有微妙嘅變化,首先係打返4後衛,而且杜巴夫卡、中堅舒亞、祖連頓同賴恩費沙重新得到重用👀
去到2022年,紐卡素如同「猛虎出閘」,沙特投資集團終於可以洗錢,包括係購入想回流英倫嘅查比亞、痛擊護級對手般尼嘅基斯活特、全能中場嘅甘馬雷斯、實用左閘泰格特同長人中堅丹般恩,雖然冬季花費一億歐元,買嘅人又唔係大牌球星,但實用性就相當高👍🏼
由新一年戰和屈福特起計算,紐卡素8場聯賽連續不敗,呢一段時間球隊已經搶返18分,名次亦脫離降班區,期間雖然有查比亞受傷,及後亦迎來作客三連敗,但由丹般恩取代左拉修斯後,加上左閘泰格特,後場用波同防守能力大大提升,中場有舒維擔當連接較炮角色,左中場有祖連頓以身體質素協助攻防兩端,前場雖然聖麥斯文只有扭波一項功能,但由基斯活特作支點,整套戰術非常鮮明同立體🙌🏻
「冬窗五人組」各有功用,但最令人驚喜嘅就係中場般奴甘馬雷斯,因為佢同車路士借將加拉加一樣係全能型中場,除左有防守能力,中場更可以推生個波同埋入球,絕殺李斯特城更加係靠晒佢,佢嘅好表現甚至激發左同鄉隊友祖連頓,今季祖連頓除左開發中場位置,仲要搵返對射門鞋,對戰諾域治嘅梅開二度值得一睇,所以真係不得不佩服領隊艾迪賀維嘅功架,最終紐卡素係5個月內由降班區殺上第11位衝線,準備成為「新。曼城」⚡️
作為一支咁大起伏嘅球隊,上半季嘅失利可以講係傷患、球員質素同領隊執教能力所致,但講到下半季嘅成功,除左係購入嘅球員啱用、球員嘅拼勁同領隊戰術之外,更大嘅部分係歸功於金錢💰要成為「Big 7」取代Big Six,紐卡素仍然有一大段距離,特別以下半季為例,對住曼城同利物浦明顯有幾個檔次嘅差別,即使對利物浦打逼搶踢得好都要輸,另外仲有對熱刺嘅大敗,壓前進攻後防線如同虛設,所以紐卡素要完全崛起仍然要3 4季時間,正如當年嘅曼城一樣🌙
今季代表作:紐卡素 2-0 阿仙奴🙌🏻
最佳收購:般奴甘馬雷斯 Bruno Guimaraes🇧🇷半季5球1助攻
最佳球員:般奴甘馬雷斯🇧🇷
最佳進步球員:祖連頓 Joelinton🇧🇷4球1助攻
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

留言


請按此登錄後留言。未成為會員? 立即註冊
    快捷鍵:←
    快捷鍵:→