韋斯咸力戰曼城2比2打和

韋斯咸力戰曼城2比2打和

首循環曼城同韋斯咸要打雪戰，嚟到韋斯咸主場兩隊就要係雨中激戰，但一啲都無影響韋斯咸嘅發揮，今日韋斯咸嘅防守超級有紀律，基士維係左邊將士用命閘波，一對中場收到禁區頂封位，左右兩翼必定回防，著力防守反擊搵安東尼奧做第一點🔥對於全軍退守嘅韋斯咸，曼城無計可施，較有威脅嘅反而係中堅拿撲迪同費蘭甸奴禁區外嘅遠射🥵然而今日曼城嘅防線相當一般，韋斯咸反擊經常比到安東尼奧，而32歲嘅安東尼奧見到費蘭甸奴就嘗試以速度突破，結果24分鐘韋斯咸一次反擊，柏保路科奴斯左路彈到比右翼嘅查洛保雲，壓入禁區窄角度僅僅射入遠柱💯45分鐘再有一次快速反擊，龍門法比安斯基大腳斬前，蘇錫克頂後，安東尼奧即刻傳比查洛保雲，辛真高想製造越位陷阱但慢一步，比保雲突破越位單刀射入，上半場已經梅開二度🔥🔥🔥
下半場曼城力求追平，49分鐘洛迪係禁區set返比基亞利殊勁射，省中韋斯咸守衛彈高少少追返一球⚡️但其實韋斯咸都有機會，64分鐘懷斯逼住費蘭甸奴，後者係中場線附近打算回比艾達臣但比安東尼奧捉晒路，單刀姿態可惜力水唔準確未能拉開比數🥵
大難不死嘅曼城係69分鐘一次罰球攻勢，高法奧解圍心切頂入自己龍門，2比2打和，而其後82分鐘中堅道臣係禁區一次防守侵犯左耶穌仔，本以為結局同對車路士一樣，但法比安斯基力保不失撲走馬列斯嘅十二碼，最終韋斯咸2比2戰和曼城，曼城同利物浦相差4分但曼城打多1場，至於韋斯咸對歐霸席位仲有機會，但今日場比賽就解釋左點解查洛保雲入選今季最佳球員之一🙌🏻如果睇到呢度，不妨follow我地嘅instagram睇到更多唔同嘅足球資訊！
IG : Footballarena_hk
Facebook: 足球港場