英超賽季總結 - 第8位 李斯特城(下)

足球港場 於 26/06/2022 發表 收藏文章
《英超賽季總結》
第8️⃣位 李斯特城🦊(下集)
loading
基於篇幅過長要分上下兩集🥲上集提到李斯特城去到3月中先迎來真正嘅曙光,因為係3月18號科芬拿係歐協聯對雷恩嘅賽事正選上陣兼攻入關鍵一球,入球後立即衝向羅渣士擁抱慶祝🥰2日後對戰賓福特,輪到卡斯坦尼傷癒復出轟入世界波,連伊雲斯都係同場復出,仲有列卡度彭利拿,可以話整體實力都回復返唔少🙌🏻
基於同前列球隊分數差距較大,贏下歐協聯冠軍以取得來季歐霸盃席位成為唯一出路,因此羅渣士亦刻意作出輪換,聯賽收油而歐協聯就博到盡,其中次回合對PSV嘅反勝更加係蕩氣回腸,因為麥迪臣係個一場擔大旗,即使泰利文斯有犯錯,但有麥迪臣攻入一球同一個間接助攻帶領球隊殺入四強,呢一場反勝相當熱血值得一看🔥
最後講到歐協聯四強,先講賽果兩回合計羅馬以2比1淘汰李城晉身決賽,當然結果係重要,但更重要嘅係過程,面對摩連奴嘅防反戰術,次回合羅渣士係無針對戰術,羅馬嘅招式主要落係左翼衛同中鋒艾巴咸,首循環羅渣士識得利用班尼斯係下半場以體力優勢衝擊羅馬,但次回合卻無針對戰術兼且無招可變,即使下半場改踢3-5-2陣式亦無補於事,終於距離決賽只差一步黯然出局😩儘管大半季李城嘅表現係失色,歐霸、聯賽盃、足總盃出局,甚至係被大炒被絕殺,更失望嘅係喺生死關頭無針對戰術,無利用兩隊之間嘅體力差距,縱觀整季最失望先係呢一點😩
最終李斯特城四強止步,佢地係餘下嘅比賽卸下壓力,最後5場聯賽3勝1和,球隊亦從第10位重返第8位衝線🙌🏻
以第8位衝線,意味着下季李城無緣歐洲賽,單線作戰之下有望提升比賽戰績同減少傷患,正如上集誇張地提到受過傷先係李城球員,不過凡事都有兩面,因為正選球員有傷未能出戰會給予其他球員機會,例如係左閘盧克湯馬士穩定成長,能夠充分擔任輪換角色,中場有杜斯貝利荷爾冒起,後上埋門嘅能力令佢成為中場可靠人選,仲有林柏拉斯文迪係非洲盃後亦獲得更多機會,但當然有好亦有壞,購入嘅蘇馬里仍未適應英超節奏,仲有前途未明嘅泰利文斯,確實今季嘅狀態係有所下滑,有傳佢離隊嘅消息都傳足大半季,繼而令佢係場上嘅表現亦唔係咁集中,導致佢今季聯賽有4次犯錯輸十二碼,此紀錄更係英超之冠🤦🏾‍♂️談論到佢下半季嘅表現更差,沒錯佢嘅表現係每況愈下,但問題在於本來擔任掃蕩角色係佢嘅拍擋尼迪迪,但尼迪迪自3月中就傷出,墜後防守+連接中場係泰利文斯下半季嘅新角色,再後一格間接壓縮佢嘅發揮空間,加上位置同工作嘅唔熟悉,導致佢嘅表現未如理想,而重點唔係佢自己突然狀態下滑~
最後,「一鼓作氣,再而衰,三而竭」,確實三次競逐歐聯或歐洲賽都失敗令人氣餒,但今季都算係贏下社區盾同歷史性首次殺入歐洲賽四強,所以係球員健康嘅情況下,下季必定有望重返前六🔥
「贏,我陪你君臨天下;輸,我陪你東山再起!」呢句說話除左係球隊同球員講,更加係球迷同球隊講,因為李斯特城3月就同科芬拿、側士田同列卡度彭利拿續約至2026同2027年,球隊對曾經受過大傷嘅球員唔會放棄,同時間球迷對球隊嘅支持點會因為一季失利,仲要係傷兵問題,而對球隊無信心?所以借用李斯特城嘅會歌《Foxes Never Quit》作結🦊
今季代表作:燕豪芬 1-2 李斯特城🙌🏻
最佳收購:盧克文 Ademola Lookman🇳🇬(外借加盟,其餘四位完全揀唔落手)
最佳球員:麥迪臣 James Maddison🏴󠁧󠁢󠁥󠁮󠁧󠁿12球8助攻
最佳進步球員:杜斯貝利荷爾 Kiernan Dewsbury-Hall🏴󠁧󠁢󠁥󠁮󠁧󠁿1球2助攻
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→