英超賽季總結 - 第19位 屈福特

足球港場 於 08/06/2022 發表 收藏文章
《英超賽季總結》
第1️⃣9️⃣位 屈福特🐝
loading

如果講諾域治履行返「英超升降機」嘅傳統,今日要講嘅屈福特雖然都係升降機,但係佢地保持另一種傳統,就係保素家族嘅「傳統」,今季經歷2次換帥,下半季由74歲嘅鶴臣爺爺出山幫手護級,真係神仙都難救,雖然屈福特只係比榜尾多一分,但整體上佢地打出嘅態度同拼勁,都唔似會得到咁低嘅分數,所以球隊一整季經歷三種不同風格嘅執教領隊,或者就係今季失利嘅主因,當然~不得不提仲有玩爛「玩具」嘅詛咒🤣
預測:第19位(現實:✅)
開季前我哋預測屈福特會以尾二嘅成績降班,估唔到屈福特真係難逃一劫,而其實係夏季轉會窗都睇到一啲端倪,8月嘅時候屈福特足足簽左8個球員,其中真正幫到手嘅只有梅沙施素高同丹尼斯,其他嘅丹尼路斯、艾殊利費查(Ashley Fletcher)、艾迪保(Oghenekaro Etebo)同杜凡(Ozan Tufan)未到半季已經被棄用,仲有祖舒亞京治同古卡(Juraj Kucka)嘅直接作用不大🥵
去返正式開季嘅時候,當時仍然係升班領隊悉斯高(Xisco)帶隊,佢係英超第7輪後就被解僱,當時嘅戰績係2勝1和4負,伊斯美蘭沙亞同丹尼斯左右開弓,雖然當時球隊排第15位,但嘗試進攻嘅足球過於危險,防守方面又唔係彪炳,7場比賽失10球,結果管理層決定「未雨綢繆」,解雇悉斯高成為英超第一滴血,並聘請「救火領隊」雲尼亞里🇮🇹
70歲嘅雲尼亞里10月上任,第一仗面對利物浦,或許有球迷希望見到新領隊新景象可以對抗利物浦,但當時如日中天嘅沙拿就係個一場三人包夾之下仍然能夠入球,結果第一仗被大炒5球,埋下日後被炒嘅伏線🤧
雲尼亞里係屈福特領軍聯賽13場,錄得2勝1和10負嘅戰績,成績強差人意,但11月嘅時候打出今季屈福特嘅代表作,就係主場4比1大炒曼聯嘅賽事,但同時亦玩爛「玩具」,及後8場聯賽1和7負,最終救火領隊並冇救火,反而火上加油,成績跌到落榜尾,而雲尼亞里唯一算係有功勞嘅係將丹尼斯嘅狀態發揮得最好,在任期間交出6球4助攻,同埋喺一月嘅時候簽入左閘卡馬拉(Hassane Kamara),提升左閘防守力。
2月嘅來臨,屈福特要谷底翻身,搵嚟「真救火專家」74歲嘅鶴臣爺爺,而過往幾季睇開水晶宮嘅比賽都知道,戰術就係縮後防守打反擊,雖然冬窗收購嘅卡馬拉確實增強左路防守力,中路亦有施素高成為大將,不過始終攻守兩端嘅質素比起英超球隊都係有差距,最終提早三輪正式降班❌
嚟緊重回英冠嘅屈福特,早前已經宣佈新領隊將會由艾華士(Rob Edwards)出任,此教頭今季帶領格連森林係英乙升班,但面對屈福特呢隊升降機,絕對係困難重重,除左係球隊早前宣佈賓科士打、古卡、艾迪保會離隊,今季發揮得最好嘅丹尼斯有唔少球隊對佢有興趣,所以保留現有人腳係最重要嘅任務,希望呢位新領隊能夠完整地執教一季啦😈
今季代表作:屈福特 4-1 曼聯🙌🏻
最佳收購:丹尼斯 Emmanuel Dennis🇳🇬10球6助攻
最佳球員:丹尼斯 Emmanuel Dennis🇳🇬
最佳進步球員:胡安靴蘭迪斯 Juan Hernández🇨🇴5球2助攻
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→