英超賽季總結 - 第18位 般尼

足球港場 於 09/06/2022 發表 收藏文章
《英超賽季總結》
第1️⃣8️⃣位 般尼🛡
loading

般尼從來不易,這個你我早已經知🎶等一等,相信呢支歌仔會係下季少啲聽到,因為今日要講嘅球隊係不幸降班嘅般尼,佢並無升降機嘅傳統,甚至可以講係保留英式踢法「高Q大棍」嘅傳統,不過面對油王來襲,即使後段終結同戴治長達9年半嘅「愛情長跑」,戰鬥到最後一刻仍然未能扭轉降班嘅遭遇🤧
現實:第18位 預測:第15位(⬇️3位)
開季之前我哋預測上季僅僅排係第17位嘅般尼係今季能夠保持一貫水準兼且排係第15位,連續留喺英超六季嘅般尼,其實大家都對佢地嘅踢法好熟悉,另外係轉會方面,管理層投資有限,變相戴治亦限米煮限飯,近年嘅轉會最高只係以1500萬歐元購入哥尼特,而今個夏天般尼繼續少修少補,除左免費購入後備門將軒尼斯同艾朗連儂,後防購入哥連斯(Nathan Collins)同干拿羅拔斯,前線卻作出突破,由法甲里昂引入「Umbro哥」哥尼特(Maxwel Cornet),而呢單轉會亦出奇地得到回報😳
去到正式開季,頭17輪聯賽般尼都係一貫水準,1勝8和8負繼續為護級而努力,當時前線哥尼特拍住基斯活特,前者就攻入6球,後者就攻入3球,名次亦排係第16位,一切都平平無奇,直到冬季轉會窗嘅開始🥶
1月展開嘅冬季轉會窗,紐卡素有油王入主後為左護級無所不用其極,決定以3000萬歐元解約費直接撬走基斯活特,呢招以本傷人嘅招式令般尼元氣大傷,因為般尼嘅戰術體系就係以基斯活特作第一點,然後再打反擊,因此無左基斯活特如同廢咗般尼一半武功🥵
面對危機,般尼立即係市場尋找同類型嘅前鋒,結果就係德甲禾夫斯堡以1400萬歐元引入大舊佬域賀斯,以域賀斯嘅水平同呢個價錢,般尼甚至可以講係有少少提升質素,然而德甲同英超係有差距,佢亦需要時間同球員磨合,再者般尼本來就係一隊為護級而戰嘅球隊,面對如此變化,或者壞事情係一不離二,二不離三,2月尾起右翼古蒙臣、左閘皮特斯(Erik Pieters)、中堅賓美爾同哥尼特都相繼傷出,上述球員都係5月先至復出,同時間右翼嘅麥尼爾今季狀態不穩,對比起上季嘅2球5助攻,今季只有一助攻兼且顆粒無收,令到般尼雪上加霜🤧
面對種種不利因素,幸好嘅係大部分球員對一貫嘅體系非常熟悉,所以係基斯活特離隊後,13場聯賽3勝4和6負,比例上反而更好,但係第29輪聯賽嘅護級大戰,般尼以0-2作客輸比諾域治後,管理層急於求變,竟然係無清晰嘅計劃就解僱執教9年半嘅戴治,及後8輪聯賽係由U23嘅米高積遜同中堅賓美爾代領,諷刺嘅係米高積遜都表示有打電話向戴治搵幫手,因此今季般尼降班管理層確實要負起部份責任🤷🏽
不過,或者係解僱戴治激起球員鬥心,甚至係為戴治而戰,所以暫代領隊上任後4場不敗兼且係1和3勝,搶到10分後球隊係曾經逃出降班區,不過當時中場韋斯活特嚴重受傷,中堅達哥夫斯基受傷左右比賽走勢,對熱刺一戰未能守到最後確實可惜,最終係最後一輪聯賽以1比2落敗予紐卡素,相隔六季重返英冠聯賽❌
今季嘅降班除左因為基斯活特被撬同季中傷兵潮,正如上述管理層急於求變亦有責任,而下季盛傳般尼會聘請曼城名宿甘賓尼執教,或許令人期待,但更令人感到興趣嘅係有邊啲球員會離隊,暫時達哥夫斯基將會轉投愛華頓,陣中嘅域賀斯、哥尼特、麥尼爾同門將樸比都有能力留喺英超,所以即管睇吓有邊啲般尼球員會被收購🙌🏻
今季代表作:般尼 3-2 愛華頓🙌🏻
最佳收購:哥尼特 Maxwel Cornet🇨🇮 9球1助攻
最佳球員:哥連斯 Nathan Collins🇮🇪
最佳進步球員:哥連斯 Nathan Collins🇮🇪
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→