英超賽季總結 - 第14位 阿士東維拉

足球港場 於 15/06/2022 發表 收藏文章
《英超賽季總結》
第1️⃣4️⃣位 阿士東維拉🦁
loading

如果「人品好,牌品自然好」,咁套落今日要講嘅球隊阿士東維拉,就會變成「領隊好,球隊自然好」⭐️對於皇牌核心基亞利殊被曼城以天價收購而去,夏季轉會窗大手入貨但未能幫助球隊,經歷換帥後球隊大不同,由護級球隊變成前途無量嘅球隊,就係源自於一個男人,但個位男人係咪真係咁有料呢😈
現實:第14位 預測:第9位(⬇️5位)
開季前作出嘅預測,當時基亞利殊仍未離隊,即使後來轉投曼城,亦有新加盟嘅貝安迪亞擔當進攻核心,做返類近嘅工作,然而失去基亞利殊嘅影響比相像中大,包括領隊戰術失衡,球員狀態不復當年勇,上季嘅艾加斯(Anwar El-Ghazi)攻入10球,貝查特查奧爾攻入7球6助攻,但今季兩位進攻好手就打回原形,前者被放棄兼外借到愛華頓,後者就甚少得到上場機會,結果今季就只有屈堅斯聯賽入球上雙位數🥵
對於曼城以一億鎊買人,維拉係夏季轉會窗嘅預算就相當充裕,當時先用3000萬歐元購入丹尼京斯,再以3800萬歐元引入攻擊中場貝安迪亞,3200萬歐元從德甲利華古遜帶來利安拜利,如此一億鎊就咁洗去,當然8月嘅時候都有免簽楊格同借用中堅杜安沙比,但夏天5個引援都係失敗居多🥲
開季嘅時候維拉對住升班馬屈福特就迎來首敗,熟悉嘅4-2-3-1陣式未能取得勝利,為左加強防守同協助進攻,領隊甸史密夫就扭轉陣式至三中堅雙前鋒,確實球隊曾經打出兩連勝,但基於明斯今季狀態明顯下滑,另外兩位中堅候斯同干沙都唔係出色嘅中堅人選,因此10月起迎來5連敗,聯賽排名一度跌到去第16位,因為同上季表現有強烈嘅出入,甸史密夫被維拉解僱,並搵嚟神奇隊長 - 謝拉特⭐️
當時由謝拉特領軍一度引起球迷嘅質疑,畢竟近兩三季都見過唔少名宿教波跟住出事,不過呢位紅軍名宿係蘇超可以帶格拉斯哥流浪重拾榮耀,一開始係英超都取得唔錯嘅成績,頭6場聯賽4勝2負,名次由第16位重返中游嘅第10位,對於舊東家利物浦亦絕無放水,紅軍亦只係以十二碼僅僅贏一球🥶
嚟到冬季轉會窗,謝拉特就正式發功,先係借入舊隊友古天奴,再冷手執個熱煎堆購入愛華頓棄將盧卡斯迪尼,單論呢兩個引援已經直接幫助球隊,前者古天奴頭8場交出4球3助攻,後者左閘迪尼下半季都交出4個助攻,整隊維拉頓時變得不一樣🔥
4-3-1-2嘅陣式由古天奴擔任攻擊中場,三中場就有爛打嘅麥堅,防中道格拉斯雷斯有防守有推進,仲有今季冒起嘅積及藍斯,推波癡腳兼且夠靈活,配合着古天奴一度3場攻入3球1助攻⚡️
然而聖誕樹陣式都有一個弊病,正如下半季對阿仙奴一伇,維拉兩閘經常要以一敵二,另外被熱刺大炒4球一仗,一對中堅表現麻麻,壓前進攻丹尼京斯嘅把握力又差啲,另一位前鋒屈堅斯雖然係今季球隊嘅神射手,聯賽攻入11球,但係聯賽最後一場對曼城就睇到佢嘅入球能力仍然有非常大嘅改善空間🥵所以經歷換帥同引援等事情,謝拉特能夠帶領維拉以14位衝線,都算係合格👀
呼應返上述名宿教波,拎返球員時代就作比較嘅林柏特同謝拉特相比,謝拉特明顯有個人戰術嘅一套,對曼城一戰差啲幫利物浦攞到冠軍,低位防守反擊快速有效直接,不過限於球員質素未能發揮出最大效果🥲話雖如此,阿士東維拉最好彩嘅係搵到一個有人際網絡嘅領隊,因為維拉係現時已經簽下4位新兵,大部分都係基於想跟謝拉特學野而來投,所以話「領隊好,球隊自然好」真係符合今季嘅阿士東維拉,期待下一季謝拉特領軍全季會有咩成績😈
今季代表作:阿士東維拉 3-3 列斯聯🙌🏻
最佳收購:古天奴 Philippe Coutinho🇧🇷19場5球3助攻
最佳球員:麥堅 John McGinn🏴󠁧󠁢󠁳󠁣󠁴󠁿3球4助攻
最佳進步球員:積及藍斯 Jacob Ramsey🏴󠁧󠁢󠁥󠁮󠁧󠁿21歲6球1助攻
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→