英超賽季總結 - 第12位 水晶宮

足球港場 於 18/06/2022 發表 收藏文章
《英超賽季總結》
第1️⃣2️⃣位 水晶宮🔮
loading

「黑色肌膚給他的意義🎶」黑人球員為主嘅水晶宮,上季鶴臣爺爺卸下重擔,由「大肉腸」韋拉執起教鞭,一度引起球迷質疑佢嘅執教能力,畢竟佢嘅CV確實麻麻,但係水晶宮係佢執教底下,由4-4-2陣式兼沙夏一人球隊,變成進攻足球兼且注入地面搓傳踢法,驚喜處處之餘仲有借將干拿加拉加嘅冒起,令到呢隊水晶宮成為新一代嘅中游實力份子💪🏽
現實:第12位 預測:第12位(✅)
開季前嘅預測竟然同一季過後嘅成績如出一轍,上季雖然排係第14位,但季後其實要送走唔少冗員,例如係雲安荷特同中堅薩高等等,而同時推斷韋拉帶領水晶宮係危機四伏,因為沙夏經常有離心,艾斯(Eberechi Eze)又要休戰半年養傷,然而唔講唔覺韋拉係夏天引援係相當出色🔥
第一個係米高奧利斯,唔洗一千萬歐元就由雷丁帶走。第二個係中堅古希,今季表現獲得肯定入選英格蘭國家隊。第三個1800萬歐元從里昂收購中堅安達臣,對住阿仙奴兩腳助攻都已經值回票價,仲未計係用波型中堅。第四個干拿加拉加唔使多講,第五個韋曉士都係無名英雄,第六個前鋒艾度亞特(Odsonne Edouard)就算係錦上添花😳的確對比起過往鶴臣爺爺領軍所作出嘅小修小補,今季確實大手投資,合共花費8500萬歐元,轉會支出僅次於利物浦同熱刺,但係考慮到過往嘅積弱,同埋6個引援都係有用,所以絕對係花費得正確兼值得,要知道大手買人不等於一定有用,正如某倫敦以外嘅球隊💩
去到開季,面對強隊佢地未有足夠能力應對,但係面對同級對手或者係護級球隊,水晶宮都能夠保持有分落袋,直到頭12輪聯賽,3勝7和2負,雖然落敗予車路士同利物浦,但亦幾乎戰勝阿仙奴同憑着人數優勢擊敗曼城,所以頭3分1聯賽成績亦算唔錯⚡️
但係球隊嘅命運唔係一帆風順,連續7場不敗後12月初中堅安達臣因傷缺陣,由老將湯堅斯頂上,結果就迎來三連敗😳及後下半季水晶宮嘅表現都係浮浮沉沉,值得一提嘅係1月嘅時候沙夏、舒臘普、佐敦阿休同高耶迪要離隊出戰非洲盃,過往水晶宮作為沙夏嘅一人球隊,如果無佢在陣球隊就接近玩完,但今次缺陣5場都有2勝1和,米高奧利斯甚至得到解放,其中4場交出2球2助攻,所以水晶宮已經今時唔同往日~
集齊主力兼且熟習戰術嘅水晶宮係2月到4月期間,各項賽事11場只有1負,當中包括0比0守和曼城,4比0大炒愛華頓晉級足總盃四強,同埋3比0擊敗要爭四嘅阿仙奴,三場關鍵嘅賽事同埋大半季嘅良好表現,令到中堅古希、左閘泰歷米曹同車路士借將干拿加拉加,水晶宮三子入選英格蘭大國腳,由此可以睇得出水晶宮今季嘅進步🔥而及後雖然係足總盃四強被車路士淘汰出局,但聯賽上不過不失地以第12名衝線🙌🏻
以上嘅聯賽戰績比較上係無重點,源於球隊繼續保持和波較多嘅趨勢,合共全季15場和波,但係得失球方面係近年首次有正數,入球數有少許進步,但失球就首次降至50球以下😧因此名次雖然繼續係中游,但係進攻、防守、戰術同心態都有各方面嘅提升,例如雖然今季都係沙夏入最多波,聯賽攻入14球,但今季有艾度亞特、加拉加同2月正式加盟嘅馬迪達分擔入球重責,仲有少主艾斯同奧利斯,呢兩位翼鋒前途無可限量🙌🏻而後面就有古希同泰歷米曹有大幅度嘅進步,所以往後水晶宮都係唔易食嘅球隊。
然而,今季三戰車路士全敗,好大原因係借將加拉加唔能夠上陣,延伸到下季加拉加會回歸車仔,韋曉士就要繼承佢嘅工作,能否交出同樣水準就有待商榷。另外有15場和波,當然季初需要時間磨合、人腳未齊同戰術需要都有影響,但係上半季曾經有阿仙奴係最後一刻追平,下半季對愛華頓有被其3比2反勝,球隊應對高空波同右閘仍然有提升嘅空間🥲最後對於韋拉首季領軍,其後嘅引援都有直接效用同埋打入足總盃四強,今季嘅成績已經係高於預期,因此要留意嘅係「後。加拉加」時代嘅水晶宮會如何發展👀
今季代表作:水晶宮 3-0 阿仙奴🙌🏻
最佳收購:古希 Marc Guehi🏴󠁧󠁢󠁥󠁮󠁧󠁿21歲中堅(唔計借用嘅加拉加)
最佳球員:干拿加拉加 Conor Gallagher🏴󠁧󠁢󠁥󠁮󠁧󠁿中場球員8球3助攻
最佳進步球員:泰歷米曹 Tyrick Mitchell🏴󠁧󠁢󠁥󠁮󠁧󠁿22歲左閘球員
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→