英超賽季總結 - 第10位 狼隊

足球港場 於 20/06/2022 發表 收藏文章
《英超賽季總結》
第1️⃣0️⃣位 狼隊🐺
loading

終於講完下半版嘅球隊,今日就要講排係中游第10名嘅狼隊,今季狼隊除左有魯爾占美利斯同柏度尼圖(Pedro Neto)復出之外,更加一改買水貨嘅命運,新領隊般奴拿治竟然能夠無縫接軌地帶領狼隊保持中游位置,實在係喜出望外👀
現實:第10位 預測:第14位(⬆️4位)
開季前我地預測狼隊會再退一步完成賽季,上季嘅狼隊攻守失衡,前鋒魯爾占美利斯頭骨破裂要休戰,購入嘅球員卻係水貨,包括巴塞嘅施美度、波圖前鋒法比奧施華同冬季急救嘅韋利華荷西,三個引援都係失敗收場,季尾仲有龍門柏捷斯奧同升班領隊紐奴離隊,狼隊當時嘅前景可謂暗淡😢
不過狼隊除左係「葡萄牙國家二隊」,更加同經理人文迪斯合作無間,引入嘅新領隊般奴拿治正正就有文迪斯暗中推波助瀾,呢位般奴拿治都係葡萄牙人,雖然執教履歷唔係出眾,但夏天引援亦算係眼光獨到,先係以800萬歐元引入葡萄牙門將祖斯沙,再借入巴塞葡萄牙年輕翼鋒查卡奧同借用前鋒黃喜燦,仲有帶來20歲左閘艾約奴利(Rayan Aït-Nouri),以上主要收購都係上半季取得成果🔥
開季初狼隊換帥後迎來3連敗,三場都係僅僅輸1球,頭5場聯賽佢地採取進攻戰術,每場平均起腳10次但只入兩球,3-4-3嘅三箭頭右翼查卡奧為技術型踢法,身體對抗性不足,另一邊嘅查奧爾身體對抗性100分,但射門傳球就只有50分,中鋒占美利斯復出仍然尋找狀態,結果三箭頭毫不鋒利🥲
成績唔理想之下般奴拿治作出改變,除左係戰術上變成防守反擊,同時提拔有身形優勢嘅黃喜燦替代查奧爾,結果對紐卡素一仗梅開二度,6場聯賽交出4球,亮眼嘅表現令佢得到狼隊出手買斷,由RB萊比錫正式加盟狼隊🐺
著重防守嘅佢地開始得到回報,曾經9場聯賽只敗一場,當中佢地曾經3比2絕殺阿士東維拉,係12月初更加打出佢地嘅代表作,就係0比1僅僅落敗予利物浦🙌🏻確實呢一場比賽狼隊係輸波,但具有代表性係因為賽情反映整季嘅表現,包括後場防守堅固,祖斯沙拍住三中堅形成銅牆鐵壁,而左閘嘅艾約奴利更加成為沙拿嘅「貼身膏藥」,博到90分鐘被換走先被沙拿助攻奧歷基絕殺,而90分鐘內狼隊偶有反擊都係未能打破缺口,正如整季嘅狼隊,守強於攻,防守上佢地共失43球,為英超第五位,而進攻卻係排係英超尾四攻入38球,所以以呢種攻擊力能夠排係中游確實唔簡單🤣
然而頑強嘅防守力同貧乏嘅進攻力捱得到上半季,下半季嘅成績就開始向下,特別係3月中開始到季尾9場只得1勝,當中魯賓尼維斯因傷缺陣至5月先復出,魯爾占美利斯又因為紅牌停賽3場,第二前鋒黃喜燦季中受傷後狀態不復,加上普丹斯(Daniel Podence)同右中堅奇利文(Max Kilman)相繼傷出,人腳不整下戰績倒水,最終未能保住坐左23週嘅第8位,最後一輪輸比爭冠嘅利物浦後以第10名衝線🙌🏻
曾經征戰過歐洲賽嘅狼隊,今季穩坐第8位但最後跌落第10名衝線,當然有進步空間,但前題係要解決人手問題,中堅有老大哥沙斯(Romain Saiss)離隊,中場有唔同球會對尼維斯有興趣,而前鋒魯爾占美利斯狀態大不如前,黃喜燦下半季非常沉寂,入球榜第三位已經數到中堅高迪,因此加強前線入球能力有迫切需要,特別係軍備競賽下嘅英超🥵
今季代表作:狼隊 0-1 利物浦🙌🏻
最佳收購:祖斯沙 José Sá🇵🇹撲救率75.2% 英超第二
最佳球員:祖斯沙 José Sá🇵🇹阻擋7.5個預計入球
最佳進步球員:艾約奴利 Rayan Ait Nouri🇫🇷首循環對利物浦幾乎守到尾
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→