羅馬主帥迪羅斯獲續約 季中頂替摩連奴17場只敗2場

羅馬主帥迪羅斯獲續約 季中頂替摩連奴17場只敗2場

根據羅馬官方宣布，球隊將會同主帥迪羅斯續約，有消息報導迪羅斯將會同羅馬簽約兩年到2026年6月。
現年40歲嘅迪羅斯(Daniele De Rossi)係1月接替摩連奴，執教羅馬到今季季尾，本以為係管理層搵一位名宿壓制住更衣室對於換帥嘅不滿之情，豈料迪羅斯激發起羅馬兵嘅進攻能力，由摩氏羅馬嘅3-5–2防反陣式，轉為4-3-3陣式，前線以盧卡古為中鋒，艾沙拉維同戴巴拿為左右兩翼，龍門方面則扶正2號門將Mike Svilar為正選，一對中堅則以文仙尼(Gianluca Mancini)同尼迪卡(Evan N’Dicka)為核心，結果上任後領軍17場賽事只敗兩場，分別係2比4落敗予榜首嘅國際米蘭同歐霸盃次回合落敗予白禮頓1比0，但首回合已經大勝4比0。

撇除勝率方面，賽前部署迪羅斯都有做足功課，例如歐霸盃八強首回合對AC米蘭，迪羅斯就安排艾沙拉維打右翼，聯同右閘施歷克(Mehmet Zeki Celik)一齊夾擊對方主力拉菲爾里奧(Rafeal Leao)，令對方全場0次盤球過人同只有1次傳中，防守克制之下以1比0勝出首回合。
如今羅馬歐霸盃八強兩回合計3比1淘汰AC米蘭晉級，四強對手將會係德甲冠軍利華古遜，同一時間聯賽目前以55分排第5位，同第4位嘅博洛尼亞相差4分並且踢少一場，加上目前意甲球隊歐戰成績唔錯，有望拿下額外嘅歐聯位，所以羅馬嘅來季好大機會可以重返歐聯。