紐卡素4比0大破熱刺 紐卡素2分鐘連入兩球

紐卡素4比0大破熱刺 紐卡素2分鐘連入兩球

英超星期六早場賽事，紐卡素主場迎戰熱刺，主隊方面傷兵問題依然嚴重，今場由卡夫特(Emil Krafth)拍住舒亞(Fabian Schär)拍檔一對中堅，積及梅菲(Jacob Murphy)踢左閘，前場兩翼由安東尼哥頓同哈菲班尼斯擔任。熱刺方面大部份正選已經復出，今場由賓坦古亞(Rodrigo Bentancur)取代帕比沙亞(Pape Sarr)擔任正選防中，添姆雲拿繼續擔任左翼。
上半場初段兩隊踢成均勢，都係憑着中場搶截再轉化成攻勢。紐卡素防守呈5-4-1，艾利諾安達臣(Elliot Anderson)會回後協防，守住左閘邊路位置，進攻時球隊則着重兩翼沿邊路突破，特別係左路哈菲班尼斯嘅侵略性極高。另一邊嘅熱刺依舊努力前場逼搶，只係球員把握力差，譬如添姆雲拿7分鐘反擊禁區無人看管，接應班蘭莊遜橫傳撻Q。

時間去到上半場30分鐘紐卡素反擊，般奴古馬雷斯大腳向前，安東尼哥頓食贏身位比到伊薩克，伊薩克中路一拐呃到雲迪雲(Micky van de Ven)跌低，單刀射入一比零。正當鏡頭播完入球經過，畫面一轉紐卡素又入波，33分鐘熱刺右閘樸羅(Pedro Porro)後場解圍但落係禁區嘅安東尼哥頓腳下，再次撥過雲迪雲射入，紐卡素瞬間2比0。
熱刺落後兩球之下慌失失，比紐卡素夾得更容易甩波，反擊之下前鋒伊薩克更有兩次禁區起腳嘅機會，幸好門將成功守住大門，結果紐卡素半場領先熱刺二比零。

下半場熱刺尚未能夠止血，51分鐘紐卡素後場搶截再由般奴古馬雷斯大腳斬前，伊薩克半場起動推入禁區單刀射入，個人梅開二度之餘，協助球隊領先到三比零。

熱刺防守相當不濟，特別係角球罰球都好容易比對方前鋒伊薩克頂到，而去到86分鐘確實被對方中堅舒亞頭鎚頂入角球，最終紐卡素四比零大破熱刺，暫時以50分升上第六位。

紐卡素久違嘅一場大勝，其實今場嘅部署做得相當成功，第一球同第三球都係防守反擊，大腳斬前搵到第一點再轉化成入球，正正就係針對熱刺高位逼搶嘅漏洞，而兩翼嘅表現相當搶眼，安東尼哥頓一球一助攻，伊薩克則個人梅開二度，目前聯賽攻入17球，佢都係有力挑戰英超神射手嘅其中一位前鋒。至於另一邊嘅熱刺今日攻防兩端發揮失準，上半場兩個失波或許能夠歸咎於兩閘嘅失誤，但面對紐卡素嘅逼搶，熱刺門將域卡利奧都多左大腳斬前而非堅持後場傳控，數據上今日域卡利奧足足有18次長傳，對比起上場對森林只有一腳形成巨大嘅差別。進攻方面孫興慜今日受制於防守零射門，唯一有較多起腳機會嘅就係埋門把握力差嘅添姆雲拿，對比起外借初期其實睇到同隊友嘅配合度有所增加，只係埋門一腳依舊差勁。下半場輸到三球對手進攻放緩，但熱刺依舊搵唔到破門嘅方法，後備換入嘅球員亦未能改變戰局，或者呢一點先係熱刺夏天要針對改善嘅地方。
如果睇到呢度，不妨follow我地嘅instagram同Youtube睇到更多唔同嘅足球資訊！
IG : Footballarena_hk
Facebook: 足球港場
Youtube: 足球港場 - Chung