盧頓尾段賽和森林 盧頓89分鐘角球攻勢追平1比1 精選

盧頓尾段賽和森林 盧頓89分鐘角球攻勢追平1比1

英超護級大戰，盧頓主場迎戰諾定咸森林，主隊盧頓經歷上場對般尼茅夫，上半場領先三球，下半場四球被反勝，士氣或許受到打擊，今日繼續排出3-4-2-1陣式，三中堅今日收起日本球員橋岡大樹(Daiki Hashioka)，以右閘出身嘅卡普利(Issa Kaboré)踢左中堅，奧比利(Chiedozie Ogbene)去返右翼衛，中場起用效力十年嘅安比素(Pelly-Ruddock Mpanzu)。森林方面為咗應對呢場泥漿摔角賽事，今日4-2-3-1陣式選人較為硬淨，包括係中鋒基斯活特(Chirs Wood)、防中薩卡尼(Ibrahim Sangaré)同中堅保利(Willy Boly)。
上半場盧頓較快入局，其中球隊大腦巴克利(Ross Barkley)頭11分鐘已經有三次起腳，其中一次更加係中柱彈出，同時側面反映森林對巴克利所給予嘅壓力並唔足夠，令佢有機會推順起腳。防守方面盧頓上半場初段亦成功打斷森林嘅反擊，例如伊蘭加係左路突破傳中時被森林球員搶截。

然而隨着盧頓積極嘅壓前進攻，森林開始搵到機會反擊，31分鐘伊蘭加沿左路突玻橫傳，奧歷基一射幸有盧頓中堅貝基(Reece Burke)護空門，但已經為球隊後防響起警號。結果3分鐘後森林一次進攻，右路基比斯韋特(Morgan Gibbs-White)傳中，中鋒基斯活特右腳一探撞入，森林領先一比零。
41分鐘盧頓曾經透過一次角球攻勢，由中堅文基門前撞入，可惜球證指示手球在先，入球唔成立，結果盧頓半場落後一比零。

下半場盧頓求變，收起左翼衛嘅杜迪(Alfie Doughty)，換入中鋒活祖(Cauley Woodrow)，轉成4-3-3陣式。雖然前場有多一位進攻球員，但反而被對方有更多起腳機會。賽事膠着到尾段，89分鐘盧頓角球攻勢，尾柱貝基頭鎚一頂，由門前嘅貝利(Luke Berry)加一腳入網，成功係尾段追平比分，結果盧頓主場1比1賽和森林，取得寶貴1分。

盧頓方面人腳質素有限，令到佢哋只能夠利用死球攻勢，而確實取得入球係幸運嘅地方，目前佢哋同第17位嘅森林只差3分，仍然有成功護級嘅機會。另一邊嘅森林一貫戰術防守反擊，上半場取得成效，下半場尾段先後換入中堅費列比、防中杜明基斯打算守到尾，結果打唔響如意算盤反被追平，角球防守需要有所提升，畢竟除咗尾段被追平嘅入球，上半場亦曾經被對手以角球破門，因此森林亦有需要檢討一下。
如果睇到呢度，不妨follow我地嘅instagram同Youtube睇到更多唔同嘅足球資訊！
IG : Footballarena_hk
Facebook: 足球港場
Youtube: 足球港場 - Chung