白禮頓中場比素馬將加盟熱刺

足球港場 於 14/06/2022 發表 收藏文章
白禮頓中場比素馬將加盟熱刺
loading

根據Fabrizio Romano同Sky Sports報導,白禮頓中場比素馬(Yves Bissouma)將會轉投熱刺,成為干地手下另一位中場大將,據報同白禮頓剩下一年合約嘅比素馬將會以2500萬歐元轉會費離隊,據報雙方將會簽下5年合約🙌🏻
25歲嘅比素馬效力白禮頓4季,出任防守中場嘅佢一直同唔同球隊傳出緋聞,根據Sky Sports報導,阿仙奴、阿士東維拉同愛華頓都有意簽下比素馬,但最終由熱刺跑出。其實本來比素馬同熱刺嘅傳聞反而少啲,對於比素馬加盟熱刺,來季征戰歐聯就有多啲中場人選,下半季干地都係靠晒賓坦古亞同靴爾堡兩個防中,後備嘅雲克斯就作用有限,另一位嘅史基比下半季2月起就一直養傷,所以比素馬嘅加盟就令到中場有4個啱干地用嘅人選,特別係比素馬有足夠身體對抗性同推進能力,所以呢個價錢呢個質素真係fit晒干地⚡️
對於比素馬嘅離隊,白禮頓中場有今季冒起嘅卡斯度(Moisés Caicedo)統領中場,配上另一中場哥斯(Pascal Gross)仍然有一定實力,加上有比素馬嘅轉會費又可以買人,所以白禮頓方面都唔算有太大嘅損失~
雖然比素馬嘅能力就有一定質素,但其實都有一個不穩定因素,就係比素馬係今季季初曾經因為疑似性侵事件而被拘捕,後者係10月尾復出,不過缺席比賽期間球隊係報稱球員受傷,而現時事件報稱仍然係調查階段,所以最壞打算係案件成立而球員唔能夠出戰,但當然一切仍然要等待進一步消息至6月尾先知道英國警方會否成立案件👀因此如果順利無事,今次轉會熱刺真係快狠準兼且平靚正👍🏼
如果睇到呢度,不妨follow我地嘅instagram睇到更多唔同嘅足球資訊!
IG : Footballarena_hk
Facebook: 足球港場
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→