歐國盃決賽之路 - 英格蘭

足球港場 於 10/07/2021 發表 收藏文章
歐洲國家盃決賽🏆英格蘭🏴󠁧󠁢󠁥󠁮󠁧󠁿

小組賽第一場:🏴󠁧󠁢󠁥󠁮󠁧󠁿英格蘭1️⃣-0️⃣克羅地亞🇭🇷
英格蘭第一場對住2018年世界盃亞軍克羅地亞,年輕力壯嘅英格蘭對住年華老去嘅格仔兵團,一開波就以高強度嘅前場壓迫,令到克羅地亞搵唔到節奏,上半場未能打開記錄,下半場就有加雲菲臘斯係中路突破再傳比史達寧走位接應近門射入,當中加雲菲臘斯嘅攻防能力十分全面,令佢能夠成為英格蘭嘅中場主力🥸
小組賽第二場:🏴󠁧󠁢󠁥󠁮󠁧󠁿英格蘭0️⃣-0️⃣蘇格蘭🏴󠁧󠁢󠁳󠁣󠁴󠁿
第二場英格蘭陣容換左一對閘位,由梳爾同列斯占士擔住正選,話明英蘇大戰,但結果係雷聲大雨點小,英格蘭一直未能打破鐵桶陣,9射只有一球係中龍,其後下半場甚至睇到球員錫身,55波都無嘗試去爭奪,雖然只係攞得一分,但仍然無阻英格蘭晉級之路小組賽第三場:🇨🇿捷克0️⃣-1️⃣英格蘭🏴󠁧󠁢󠁥󠁮󠁧󠁿
最後一場小組賽英格蘭都可以講係十拿九穩,而修夫基亦派出19歲嘅布卡約薩卡擔任正選上陣,佢嘅表現都令佢獲得該場嘅最佳球員,但最亮眼嘅莫過於左路史達寧,再一次接應基亞利殊嘅傳中頂入,帶領球隊小勝一球擊敗捷克,成為歷嚟以最少入球奪得小組首名嘅球隊🧐淘汰賽十六強:🏴󠁧󠁢󠁥󠁮󠁧󠁿英格蘭2️⃣-0️⃣德國🇩🇪
十六強率先對住德國,強強對碰絕對考驗英軍嘅能力,但修夫基排出嘅3-4-3陣式有效阻止德國兩隻翼衛上前斬波,果一場嘅英格蘭搓波傳控做得十分之好,上半場已經有幾次小組搓傳入到禁區,下半場直到基亞利殊69分鐘換入,隨即交出一個助攻同另一個間接助攻,佢嘅亮眼表現都為哈利簡尼攻入今屆歐國盃賽事第一球,亦令球迷開始相信英格蘭能夠走到最後🥺
淘汰賽八強:🇺🇦烏克蘭0️⃣-4️⃣英格蘭🏴󠁧󠁢󠁥󠁮󠁧󠁿
淘汰勁敵德國之後,八強對手係實力上較弱嘅烏克蘭,4分鐘就由哈利簡尼嘅入攝近門射入,率先打開紀錄,其後嘅上半場英格蘭一球在手唔同你急,拖慢節奏又唔會比到烏克蘭進攻,本以為下半場情況會同前45分鐘相似,但當烏克蘭吹起反擊嘅號角,都由英格蘭嘅入球瓦解,分別由麥佳亞、哈利簡尼同軒達臣嘅頭鎚頂入角球,65分鐘起都比主力休息,最後以4️⃣球大勝烏克蘭出線🥸最後四強:🏴󠁧󠁢󠁥󠁮󠁧󠁿英格蘭2️⃣-1️⃣丹麥🇩🇰
英格蘭係四強對住丹麥,雖然實力上兩隊差距較多,但過往英格蘭嘅進攻都靠頭鎚終結,而丹麥後防球員較為高大,基斯甸臣、卡積亞同維斯達哥平均身高190cm,頭鎚確係取唔到優勢,30分鐘由丹斯加特禁區外一個精彩罰球率先打開紀錄,英格蘭係四強終於失今屆歐國盃第一球,但領先嘅優勢好快就被薩卡消滅,佢接應哈利簡尼嘅傳球再傳中,但撞中隊中卡積亞擺烏龍扳平比數,隨後丹麥反撲力度有限,英格蘭圍攻不果,直到加時階段,英格蘭憑著一個有爭議性嘅十二碼帶走勝利,雖然卡舒柏舒米高已經撲走哈利簡尼嘅十二碼,但簡尼門前再執雞,舒米高真係無力回天,最後丹麥雖敗猶榮,英格蘭距離回家接近尾聲🏆
回顧過後,你會支持英格蘭🏴󠁧󠁢󠁥󠁮󠁧󠁿定意大利🇮🇹攞冠軍🏆👀
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→