荷蘭鐵漢

90後眼中的足球 於 27/04/2017 發表 收藏文章
小弟自上年dse完咗之後就忙住工作,所以差唔多成年無出過文,趁住呢排得閒就出番文,向大家介紹d經典球員。如果大家有印象嘅話,我曾經介紹過兩個哥倫比亞球員~希基達同華達拉馬。今次就同大家介紹一個荷蘭名將
------史譚(Jaap Stam)

若果談論邊個係最出色嘅中堅,我諗大家都有唔同嘅答案,例如:泰亞高施華,沙治奧拉莫斯,高斯尼,候姆斯。佢地分別有唔同特質令佢地成為世界級中堅,咁我諗今次要介紹嘅史譚亦都有一定級數,佢嘅頂上功夫同埋制空力可以話係一流。而且包抄同補位技術亦係相當好,時不時上前場助攻,頂波個吓嘅姿態就成個飛將軍咁。
史譚出生於荷蘭甘本,喺二十歲果年就加盟球會dos kampen,成為咗職業足球員。再喺一九九二年得到蘇禾爾嘅注視,成為咗陣中嘅一分子,隨後喺對荷華高斯嘅賽事入面,首次為球隊上陣,之後慢慢成為隊中主力球員。第二年,史譚再決定他投,今次就選擇咗威廉二世,但係球隊成續未理想,最後降班收場,但憑住精彩的演出受到更多嘅球會關注。喺威廉二世過咗一年後,史譚決意離開球會,尋找新挑戰,並加盟荷蘭勁旅PSV燕豪芬,令佢踏上球員生涯第一個高峰。

加入PSV燕豪芬第一季,史譚帶領球隊喺荷蘭盃決賽五比二大勝鹿特丹斯巴達,奪得球員生涯中第一個錦標。翌季,佢喺PSV燕豪芬成為不可或缺嘅成員,憑佢一夫當關嘅傑出表現,帶領住成條後防線,再加上球隊不乏猛將,其他球員亦都交出好表現,所以PSV燕豪芬再次成為荷甲冠軍,史譚嘅傑出表現更被受肯定,故此當選為該季嘅荷蘭足球先生。正因為當時曼聯嘅後防唔穩陣,領隊費格遜就想收購呢枝定海神針,以加強球隊嘅防守能力,經過一番商議之後,雙方達成咗共識,史譚以一千零六十萬鎊高價轉投曼聯,風頭一時無兩。

初到貴境嘅史譚唔能夠同隊友好快咁建立默契,始終荷甲同英起超有差別,所以佢起初有少少唔習慣英式足球踢法。不過,史譚好快就成功喺曼聯站穩陣腳,成為球隊後防核心。最令人認同嘅莫過於幫助曼聯奪得聯賽,足總杯同歐聯冠軍,為球隊實現三冠王霸業。佢亦喺一九九九年對李斯特城當中攻入加盟球會嘅首個入球,往後兩個球季曼聯都能夠衛冕英超,史譚真係居功至偉。正當外界都認為史譚喺曼聯平步青雲嘅時候,佢竟然向外界透露隊中秘密,又說費格遜不是,高層忍受唔到,想賣走史譚,最終佢加盟拉素。

史譚加入拉素初期,由於年紀漸大,體能開始下滑,唔能夠發揮出之前嘅好表現,拉素嘅成績亦唔多好。二零零四年,拉素奪得該屆意大利杯冠軍,但係球隊就出現財政問題,全部球員都被拖欠人工。喺水深火熱之中嘅拉素無耐咁賣走值錢球星套現,之後史譚就被賣到AC米蘭。轉投AC米蘭後,佢嘅表現有所提升,好快就成為隊中主力後衛,但係就始終同意甲冠軍無緣,但就喺意大利杯決賽倒戈戰勝拉素。當時都年過而立之年嘅史譚,加上成日受傷嘅關係,令到上陣機會大減,喺二零零六年以自由身離開AC米蘭。

離開AC米蘭後,佢就選擇加盟阿績士繼續職業生涯,好快仲做咗隊長,雖然之後痛失聯賽冠軍,但係總算奪得另一個本土錦標――荷蘭杯冠軍。由於傷患問題,佢只係效力咗績士一季就宣布掛靴,正式結束十幾年職業生涯。佢之後亦同前曼聯領隊費格遜和好始初,仲喺二零零八年重返奧脫福,擔任曼聯南美地區球探。二零一六年,佢成為英冠球隊雷丁嘅主帥,繼續佢嘅執教生涯。

睇完文嘅朋友可以喺下便留言,歡迎任何意見。想知大家嘅意見或改善地方,又或者想我介紹邊位球星都可以留言比意見,小弟會盡量配合,多謝

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Evil Jason
    Evil Jason 於 27/04/2017 評論 NO. 1

    史譚加盟曼聯首季已幫球隊攞三冠
    而非文中所說,而非一兩季站穩陣腳
    他只效力了曼聯三季便被賣至拉素

  • alfa king
    alfa king 於 28/04/2017 評論 NO. 2

    屌!你識條鉄咪,佢踢波時你仲飲緊奶咋

  • Martin-Lee Cheung
    Martin-Lee Cheung 於 28/04/2017 評論 NO. 3

    Kafuu Chan 於 1 小時前評論 NO. 11
    以前打機中堅組合就係史譚+尼斯達
    著名嘅13 31!
    點解唔講下佢初初出道時係踢前鋒,去到AC時踢過右閘?

    當時史譚嘅防守係世界級,但最大弱點就係轉身慢,當時比大哨一放即刻食塵!
    想當年前中後都好平均,就係一個艾雲都玩死你

    當時要反擊幾易,舒米高大掟比企喺右中場嘅碧咸,碧咸唔使跑就斬去左邊比傑斯快放到底線,斬番去遠柱小禁區比約基二傳比高爾埋單,比人解圍到娥眉月既話史高斯就遠射,解圍到右邊加利仔又可以斬多次.....

    而家拖左十幾分鐘都未去由自己禁區去到中場...

快捷鍵:←
快捷鍵:→