直接創造機會！門將手拋球打破健力士世界紀錄

經過德國門神紐亞等等一流門將嘅「洗禮」，而家大家都知道喺現今足球潮流中，門將可以係組織攻勢嘅起點，有一個擅長用波嘅門將就等於打多一個場區球員，而所謂「識用波」，其實唔一定淨係指出嚟參與猜波同帶波，distribution 亦都係重要能力之一，例如門將接完個波，一個drop kick如果送出一個精妙長傳，隨時造成入球機會。除咗用腳長傳之外，手拋球嘅價值其實有時被忽略，主要原因係一般門將用腳開波係大力過用手開波，所以用腳開波創造嘅機會係比用手嘅多。不過最近一位門將就打破咗手拋球嘅世界健力士世界紀錄，睇嚟佢亦都擅長用手拋球創造機會，最特別嘅係如果冇記錯，佢係嚟過香港獻技。

伊朗門將 Alireza Beiranvand 喺2016年一場對住南韓嘅國際賽中，為伊朗國家隊把守大門嘅 Beiranvand 喺禁區內用手執起咗個波，然後用盡氣力一拋，個波以拋物線飛越半場，直接去到伊朗攻擊球員嗰度，殺咗南韓防線一個措手不及，鋒將Vahid Amiri心口照前隨即形成半單刀姿態，可惜射門角度窄之餘，被守衛緊逼，最終射門斜出。不過門將 Beiranvand 直接用手開波製造快速反擊機會，已經引起注目。最終，佢喺2021年11月25日正式獲得健力士世界紀錄認證，表示佢嘅手拋球達到61米又26毫米遠，係世界上喺足球比賽中最遠嘅手拋球。


現年29歲嘅門將 Alireza Beiranvand，佢嘅故事亦係典型嘅勵志故事，佢年輕時為追逐足球夢，違背父親要求佢做一個尋常打工族嘅意願，隻身前往伊朗首都德黑蘭找尋機會，環境最惡劣時曾經要露宿街頭，後來邊踢波邊打工，做過清潔工人、製衣工人、洗車工人等等，最終捱到出頭天，喺德黑蘭球隊 Naft Tehran F.C. 出道。事實上，佢喺2014年已經喺聯賽中用超長程手拋球取得一個助攻，同年Beiranvand亦都獲得伊朗國家隊徵召，逐步成為伊朗國家隊一號門將。


2020年，Beiranvand更上一層樓，加盟比利時球會安特衛普，今年就外借到葡超博維斯塔。2019年9月10日，Beiranvand曾經嚟到香港大球場，出戰香港對伊朗嘅2022 世界盃外圍賽第二圈，伊朗以2:0擊敗香港，所以當日有入場嘅香港球迷都曾經現場睇過佢踢波；今年6月3日，香港作客伊朗，同樣係由Beiranvand把關。