輸波踢人？ C朗被指欠球品怒踢對手，球迷：「佢以為呢個係蘇B」

周日晚上英超上演「雙紅會」，狀態大勇嘅利物浦勢如破竹，上半場初段已憑拿比基達及祖達建功領先兩球，之後沙拿於38分鐘射成3-0，喺沙拿於完半場前再下一城射成4-0之前，發生一段小插曲，引起雙方球員衝突。

上半場補時階段（約46分鐘），曼聯一次攻勢，C朗拿度入楔接應隊友傳送，雖然單對單面對門將，不過射門角度相當窄，被出迎嘅艾利臣封到，個波溜到去禁區外準備出底線，C朗追住個波，利物浦嘅居迪斯鍾斯搶先半步攝咗個位，居迪斯鍾斯「得」住個位將個波撥返入嚟，呢個時候C朗仍然想搶返個波，於是隔住居迪斯鍾斯照樣張隻腳踢過去。
不過C朗嘅動作明顯過大，似乎係有啲急燥，居迪斯鍾斯跌咗落地之後，C朗仲大大力繼續踢，而且唔只一腳。結果球證都吹罰咗C朗，同時因為佢嘅過激動作，引嚟一班利物浦球員過嚟保護隊友，雙方互有推撞。



Youtube片段
https://youtu.be/1IMurMoBOkY

睇多幾次片段，其實C朗嘅動作真係幾難睇，第一腳人哋拎晒個位，佢從後成隻腳踢到人哋條腰咁高，好似兜腳「毆」埋去咁，大佬個波喺地下喎！居迪斯鍾斯跌咗落地之後，C朗的確係踢中個波，但佢踢嘅方向係居迪斯鍾斯身體嘅方向，就算俾你踢得中個波都係省埋去居迪斯鍾斯個肚度，如果想拎波唔需要咁做，再睇埋力度，好明顯係上咗頭，係發洩行為。跟據球例，咁樣蓄意踢人發洩，可以話係不君子行為，可以直接俾紅牌。

有球迷就聯想到夏薩特喺2013年踢球僮領紅牌，質疑點解C朗最終只係得到一面黃牌。網上好多球迷都批評C朗嘅行為幼稚，又有人認為佢被球證保護，換成第二位球員做同樣行為一定會被逐（試想像阿仙奴嘅格列沙加咁樣做會點）。
https://youtu.be/lCacZz-OQzU（夏薩特踢球僮片段）



都有球迷奉行「勿認真」，講笑咁話，「佢以為呢個係蘇斯克查呀」，又真係幾好笑，因為呢場最終大敗0-5之後，曼聯喺聯賽已經近四戰三負一和，未來五仗對手之中包括熱刺、曼城、車路士及阿仙奴，蘇斯克查壓力將會大到極點。