有神快拜!FIFA22速度高達88的中堅係邊個?

睇足365 於 29/09/2021 發表 收藏文章
喺遊戲《FIFA》系列入面,好多玩家都認同「天下武功唯快不破」,似乎只要球員速度夠快,就可以彌補好多不足,例如一個過頭波吊上去前場,如果前鋒好快就可以屈速單刀;另一方面,就算自己後衛防守唔係特別好,一樣可以憑速度追返對手。今集FIFA 22入面,有一位中堅嘅速度高達88,就算你睇過佢踢波,相信都未必估到係佢!

講起現今球壇頂級中堅,英超球迷可能會諗起雲迪克、魯迪加等幾位球員。雲迪克嚟講,佢身型高大,速度唔會快得去邊,但因為企位同閱讀球賽能力,你要正面爆佢亦都唔係咁容易。喺game入面,佢嘅速度係78,可以話係不過不失。

loading


魯迪加俾人印象應該都唔慢,不過佢竟然只得75速度,仲慢過雲迪克!難怪魯迪加本人喺Twitter都出個post話「有冇搞錯呀,我喺比賽中錄得35.8 km/h 速度,但得喺FIFA 22入面竟然得75速度,我要做啲咩先上到90呀?跑到50 km/h呀?」咁咪成架車咁快?

不過最搞笑嘅係,達到38歲高齡嘅前皇馬中堅比比,竟然快過晒上述兩位當打球員,真係不得了。當然,比比的確係老而彌堅,但有玩家發現佢竟然比FIFA 21時,加多咗14點速度,你估返老還童咩!所以,打機嘅嘢真係勿認真,難怪盧卡古都話FIFA根本係專登製造話題,等啲球員出嚟嘈,變相幫佢賣廣告。


言歸正傳,咁今集最快嘅中堅係邊個呢?


佢就係效力德甲禾夫斯堡嘅拿確斯(Maxence Lacroix)。呢位年僅21歲嘅法國籍中堅,2020年先由索察加盟禾夫斯堡,馬上成為禾夫斯堡嘅主力中堅之一,到現時為止暫時仲未被法國大國腳徵召,而佢嘅身高亦都有190,遊戲整體數值係79。喺遊戲入面,呢個身高加上咁變態嘅速度,而且年紀輕,相信唔少玩家會留意佢,如果你唔識佢嘅話,不妨入game睇下佢!

loading


參考資料:Sportbible

留言


請按此登錄後留言。未成為會員? 立即註冊
    快捷鍵:←
    快捷鍵:→