場外玫瑰打吡!曼聯列斯聯球迷開片,垃圾筒、枱凳橫飛

睇足365 於 15/08/2021 發表 收藏文章
記得列斯聯事隔16年重返英超之時,網上有唔少文章講述列斯聯與曼聯之間嘅世仇,好多球迷留言表示不以為然,有啲人話聽都未聽過,有啲人話年代唔同,而家邊有大戰氣氛?的而且確,近年球場上甚麼甚麼打吡大戰,已經唔再係好似以前咁飛沙劈石,郁啲就打交,不過球場外嘅氣氛就似乎仲有。當然,所謂氣氛、球味、球迷之間嘅爭鬥都係睇波嘅一部分,但係對一般市民嚟講就可能幾滋擾,睇吓以下一班曼聯球迷同列斯聯球迷點樣喺鬧市中上演一場群毆戲碼,你就明白……


岔開少少,關於點解曼聯與列斯聯之間會形成打吡戰、點解叫做「玫瑰打吡」,要由15世紀英格蘭嘅約克郡 (列斯所在地) 及蘭開夏郡 (曼徹斯特所在地) 之間嘅爭鬥,去到工業革命兩個城市嘅競爭開始睇,呢度就唔多講,有興趣嘅球迷可以輕易以「玫瑰打吡」搜尋到相關交章,亦可以睇維基百科條目 "Leeds United F.C.–Manchester United F.C. rivalry" 。


言歸正傳,剛剛周六上演咗部分英超第一輪賽事,其中正正包括曼聯對列斯聯。球場上一如球迷所言,冇乜打吡氣氛,曼聯最終以5-1輕取列斯聯,所有焦點都落喺普巴交出四個助攻,同般奴費南迪斯大演帽子戲法之上。不過原來喺比賽之前,球場外嘅場面係更加「精彩」!

loading

loading

從網上流傳影片可見,一班球迷喺街頭上演大混戰,隨手拎起垃圾筒都當成武器,打打吓更加有一張凳凌空飛過,有人被按喺地上拳打腳踢,直至有一名警員趕至現場,班人先撤離現場。據講,其中一段影片係由曼徹斯特市中心一間咖啡店內拍攝,咖啡店內有一名球迷身穿藍色曼聯球衣嘆咖啡。不過,影片中參與打鬥嘅人都唔係著住波衫,大部分穿著黑衫,只有一兩人著紅色衫,無法分辨身份。Twitter原帖中有留言就話,分唔到邊隊打邊隊,混亂間會唔會打錯人呢?但最搞笑係打完走佬嗰陣,有人執返張凳,真係好手尾,定係陣間再打過?

事實上,部分英國球迷於比賽日鬧事已經係當地人司空見慣嘅事,難怪有人喺Twitter留言話 "just being English",加上球迷受疫情影響,已經好耐冇咁齊人入場睇波,難免放縱。

留言


請按此登錄後留言。未成為會員? 立即註冊
    快捷鍵:←
    快捷鍵:→