【一代阿迷的遺憾】天才少年宮市亮加盟橫濱水手

阿仙奴球迷近呢十幾年見盡無數「新星」「天才」球員，一個個只能成為「遺憾」，當中最慘情嘅莫過於因為傷患而無法如預期成長嘅球員，其中一位十分令人印象深刻嘅係日本天才少年宮市亮（Ryo Miyaichi）。


宮市亮當年為人津津樂道嘅係佢以日本高中生身份被直接球探睇中，前往阿仙奴試腳並一舉成功，以18歲之齡直接加入阿仙奴一隊，當然伴隨著不斷外借嘅生涯亦係可以預料。不過佢初次出國時，仲係一個高中生，雖然代表過日本青年隊，但未試過踢職業球會，一同阿仙奴簽約後就被外借到荷甲飛燕諾，好快就獲得人生第一次職業足球正選上陣機會，就踢足90分鐘，兼獲選賽事最佳球員！由高中比賽，跳到荷甲，天才橫溢嘅宮市亮完全冇問題，而且迅速俘虜飛燕諾球迷嘅心，被加以為"Ryodinho" 及日本美斯之類嘅外號，第二年更獲得日本大國腳徵召。(啲名唔係我吹出嚟㗎，係外國media咁叫 e.g. Bleacher Report "Ryo Miyaichi: Signs Point to Arsenal Having the World's Next Lionel Messi", Planet Football "The seven stages of Ryo Miyaichi’s career: ‘Ryodinho’ to comeback kid")
宮市亮生涯首3場職業賽事表現
https://www.youtube.com/watch?v=bbkQ0niJ-lw

宮市亮怒爆伊雲奴域
https://youtu.be/gv6FkGPgv6U

宮市亮速度飛快、腳下功夫亦佳，可惜身體質素成為短版，佢嘅高速盤球同變向對身體負荷不少，加上對抗性不足，令佢後來被外借保頓、韋根、川迪等球會時，雖然上陣時表現出色，但開始屢受傷患困擾。最終，無法於英倫球壇立足，以自由身轉投德乙聖保利。翻查傷病史，可以發現宮市亮起初腳髁受傷，後來到大腿肌肉受傷，最終壓力轉移到膝部，進入惡性循環。因為當周邊肌肉受傷或減弱，關節、韌帶就會更容易受傷，當一邊受傷時，令一邊又會因為壓力轉移而同時變得容易受傷。黑過墨斗嘅佢，經歷過左膝十字韌帶撕裂、右膝十字韌帶撕裂，再到左膝十字韌帶撕裂。幾年前一度有專家認為佢嘅職業生涯冇辦法繼績，不過佢一直堅持，近年情況有所好轉，6年以嚟都叫做喺德乙上陣過77場，有8個入球9個助攻。

How the "Japanese Ronaldinho" ruined his career | Oh My Goal
https://www.youtube.com/watch?v=mJ4KRR5slGo

到今個夏天，28歲嘅宮市亮約滿離開聖保利，剛剛正式宣布加盟J League 球隊橫濱水手，係佢人生首次加盟日本職業球會。今次返到祖國，唔知佢可唔可以克服長期傷患，爭一口氣呢？