拉都拉唔住!門將因乜化身短跑選手衝向球證剷草?

睇足365 於 22/03/2021 發表 收藏文章
平時睇波都會發現,職業足球員已經習慣咗係唔係都向球證投訴,明明自己踢咗個波出界就舉手話係自己波,自己包曬越位又舉手做埋旁證嗰份,帶波跌低咗有理冇理用手攬住個波,擺明犯規扮無辜呢啲都常見,但睇睇下就會發現佢哋因為太投入,正所謂:「當局者迷,旁觀者清」,其實佢哋自己都俾自己呃埋,真係覺得自己無辜!以下呢單嘢正正係咁嘅情況,小弟雖然睇波多年,但仍然見識少,未見過有球員因為不滿判決,助跑衝到恆一恆對住球證剷草慶祝發洩。


越南足球相信都唔多球迷留意,仲要係越南第二級聯賽,相信只有香港球迷界奇人「十三哥」先會識,不過小弟就喺網上見到有一條趣片,覺得十分頂癮,一於同大家分享下。根據Soccerway、Sofascore等資料網站嘅訊息,呢場波係越南第二級聯賽新球季嘅第一周賽事,係喺3月19日晚上演嘅,由芹苴FC(XSKT Cần Thơ )主場迎戰人民公安(Công An Nhân Dân),客隊人民公安喺開賽4分鐘火速透過一次傳中導致主隊後防擺烏龍,先開紀錄。不過,身穿綠衫嘅主隊喺53分鐘門前扳回一城,踢成1-1。

去到87分鐘精彩事件發生!客隊人民公安一次禁區外傳球吊入禁區,位置尷尬,主隊芹苴門將出迎時與攻方球員「炒埋一碟」,球證直指12碼點,並向門將出示黃牌。睇返慢鏡,呢球波門將出迎完全掂唔到波之下,撞低咗對手,吹罰有理,但芹苴球員當然相當不滿,眼看將要被對手用一球12碼絕殺。

https://i.imgur.com/fFBMFPu.gif

點知門將 Phạm Trần Thanh Vũ 捉晒路,將12碼擋出力保不失!門將十分集中,將皮球撲向側邊之後仍然想追出去解圍,喺確保個波出咗底線之後,佢就嚟料喇。佢隨即一個轉身跑向球證慶祝,有隊友想拉住佢同佢慶祝(定驚佢打球證?),但拉都拉唔住,佢用短跑選手般嘅速度衝向球證……好彩係剷草啫!幾驚佢係飛剷球證,但佢嘅位置控制得妙到毫巔,啱啱好喺球證腳前一吋停低,多一吋都唔得掂呀!

loading


明明睇慢鏡係真係犯規犯到應一應,但睇你咁投入嘅表現,真係要寫個「服」字,不過最離奇嘅係球證竟然冇處理佢呢一下嘅發洩動作,嚴格嚟講睇佢個勢咁樣,已經可以直接出示紅牌趕佢出場!不過網上消息指,芹苴FC會方已經向球證道歉,並且內部處分門將 Phạm Trần Thanh Vũ ,將佢停賽兩場。

精華片段
https://www.youtube.com/watch?v=_aVHvXUWDH8

留言


請按此登錄後留言。未成為會員? 立即註冊
    快捷鍵:←
    快捷鍵:→