上一個有資格被封「新朗拿度」的早殘天才——阿祖安奴

睇足365 於 18/02/2021 發表 收藏文章
最近歐聯16強巴塞隆拿對巴黎聖日耳門(PSG),22歲嘅麥巴比大演帽子戲法,助PSG以4-1擊潰巴塞,取得極其關鍵嘅作客大勝,其中碧基拉都拉唔住麥巴比嘅一幕被網上瘋傳,麥巴比嘅高速盤球突破,加上外形,早有人對佢冠以「新朗拿度」之稱,但當然仍有不少爭議。「外星人」朗拿度固然係神聖不可侵犯嘅存在,但剛好一位曾經被譽為朗拿度接班人嘅昔日天才,剛剛過咗佢嘅生日,講緊嘅係阿祖安奴。


巴西前鋒阿祖安奴於1982年2月17日出生,即係啱啱過咗佢嘅39歲生日。同一日,網上紛紛「洗版」式談論麥巴比是否「新朗拿度」,可能相對冇咁多人留意到網上亦有一啲post係講噚日生日嘅阿祖安奴,包括國際米蘭官方Twitter就出咗一條阿祖安奴短片去祝佢生日快樂,咁應景嘅日子,點可以唔睇下阿祖安奴當日風釆?

loading
loading


阿祖安奴18歲時於巴西傳統勁旅法林明高出道,好快就被召入巴西大國腳,更吸引國際米蘭於2001年將佢帶到意大利。當時,佢已經被評為朗拿度未來接班人,及被意大利球迷稱為「國王」 L'Imperatore 。當年國際米蘭前線星光熠熠,年輕嘅阿祖安奴機會唔多,所以隨後轉到帕爾馬,以聯賽上陣37場入30球嘅效率,以及2004美洲國家盃金靴嘅成績,令佢重投國際米蘭。


呢個時期嘅阿祖安奴大概係最令人期待嘅下一位超級巨星,以至廣大球迷十分熟悉嘅遊戲《Winning Eleven》將佢射門力度評為99,加上各項射門數據、體能、速度數據極高,足以反映佢喺球迷心目中嘅形象,係一個步大力雄、腳腳七注嘅「怪物」,雖然已經足以令球迷津津樂道,但可惜重投國米呢一兩年亦係佢生涯嘅高峰,距離朗拿度接班人係一個極大落差。個人認為阿祖安奴比起羅賓奴及柏圖等巴西天才球員更令人可惜。


阿祖安奴當時嘅能力同天賦,最好都係由球壇中人去講。阿祖安奴係為人相當自負嘅伊巴謙莫域少有盛讚同佩服嘅球員,伊巴謙莫域曾經表示:「我同過好多冠軍級人馬踢波。我亦遇過一啲球員一開始已經好勁,同埋一啲球員俾我見到佢嘅潛力,後來果然成功。不過有一個人我覺得可以發展得更好更耐,但冇發生到,佢係我喺國際米蘭遇到嘅阿祖安奴。佢可以喺任何角度射門,冇人可以攔截到佢,冇人搶到佢個波,佢係一隻純粹嘅野獸。」

國米名宿辛尼迪回憶起阿祖安奴時,將阿祖安奴嘅「殞落」引為生平一大憾事。辛尼迪曾經話,當年有一日阿祖安奴從電話收到父親嘅死訊,令佢當場崩潰,辛尼迪自己同國米主席莫拉堤將佢當成細佬咁照顧,而阿祖安奴亦繼續為國米上陣同入波,但一切已經不再一樣。另一位國米球員哥度巴察覺到阿祖安奴心理狀態有異,嘗試鼓勵佢振作:「你係朗拿度同伊巴謙莫域嘅混合體。你有一日會成為史上最強球員,你知道嗎?」但辛尼迪、莫拉堤同哥度巴都未能將阿祖安奴從喪父陰影中拉出嚟。

loading

喪父嘅傷痛令阿祖安奴開始酗酒及沉迷「夜蒲」,最終令佢被國米及巴西國家隊放棄,身型暴漲。2008-2010年回歸巴甲,2010年協助法林明高奪冠,吸引羅馬將佢簽入,曾經一度以為「國王」回歸,但昔日野獸已一去不返。

(阿祖安奴曾成為PES封面人物)
(國際米蘭仍相當專重阿祖安奴)

兩年前,國米更推出一條長達29分鐘嘅影片向阿祖安奴致敬:
https://youtu.be/C2TaJOJ4i3Y

網上其他精華短片:
https://youtu.be/lcl2tAwi4to

留言


請按此登錄後留言。未成為會員? 立即註冊
    快捷鍵:←
    快捷鍵:→